Timor-Leste Ba Dahuluk Haruka Traballadór Barak Bá Austrália

DILI, (TATOLI) - Governu Timor-Leste liuhusi Sekretáriu Estadu Formasaun Profisionál no Empregu (SEFOPE) iha kooperasaun ho Governu Austrália ba dahuluk haruka traballadór ho kuantidade boot hamutuk 94 (mane hotu) hodi hala’o serbisu iha nasaun viziña.

Traballadór sira ne’e sei bá serbisu iha kompañia Conect Group ne’ebé  halai liu ba serbisu distribuisaun morangu (strawberry) ne’ebé maka fó serbisu ba timoroan na’in-80 no empreza Madec Mosmont fornese serbisu ba ema na’in-14 hodi aparu ai-oan, ko’a no fokit du’ut.

Embaixadór Austrália ba Timor-Leste, Peter Roberts, hatete nia hetan buat barak no furak liuhusi nia serbisu hanesan embaixadór, maibé buat ne’ebé maka gosta liu mak haree konesaun povu Timor-Leste no Austrália.

“Ami orgullu tebes ho programa serbisu sazonál, programa ne’e di’ak tebes ba traballadór timoroan sira ne’ebé hetan osan, esperiénsia serbisu no aprende abilidade foun iha setór agrikultura no ospitalidade.”

“Programa ida ne’e mós di’ak ba ami australianu ne’ebé valoriza tebes ita-boot sira-nia tulun no serbisu maka’as no di’ak loos ba agrikultór australianu ne’ebé presiza prienxe lakuna serbisu iha sira-nia to’os ou negósiu”, Peter afirma ohin, iha Kaikoli iha ámbitu despedidade ba traballadór timoroan ne’ebé sei dezloka bá Austrália aban atu hala’o sira-nia knaar ne’e.

Hatutan tinan-tinan númeru serbisu-na’in aumenta ba beibeik dezde komesa ho ema na’in-11 iha 2012 no ema ne’ebé haruka kada tinan dobru.

“Iha tinan finanseiru ida ne’e, ita iha kamiñu (dalan) atu haruka ita-boot sira bá Austrália hamutuk rihun-ida-atus-lima. Ita-boot sira hotu sei hetan oportunidade hodi hetan osan no abilidade ne’ebé ita-boot sira bele lori fila hodi dezenvolve Timor-Leste”.

SEFOPE, Julião da Silva, dehan Governu iha nia kompromisu atubele fasilita sidadaun sira atu hetan kampu serbisu la’ós de’it iha rai-laran, maibé mós rai-li’ur.

“Ita tinan sanulu-resin ona nasaun ne’e hamriik, ita seidauk iha indústria boot ida iha nasaun, entaun Governu liuhusi meiu hotu Ministériu Negósiu Estranjeiru no Kooperasaun através serbisu SEFOPE nian oinsá bele buka dalan atu nune’e fasilita timoroan, tanba ne’e ita konsege servisu hamutuk ho Governu Austrália nomós Governu Korea atu fasilita serbisu ba timoroan sira”.

Julião husu ba traballadór na’in-94 ne’e atu ajuda Governu maka asegura perfoma serbisu iha ema nia rai no bainhira osan ne’ebé simu bele ajuda familía sira.

“Ita agradese ba Governu Austrália liuliu povu agrikultór ne’ebé hakarak husu tulun. Ita bá ne’e la’ós sai hanesan kriadu, maibé ita bá atu ajuda sira tanba sira-nia agrikultura ne’e boot, entaun husu ita-boot sira bá iha ne’ebé bele aprende buat balun para aplika filafali mai ita-nia nasaun”.

Jornalista: Maria Auxiliadora | Editór: Manuel Pinto

Imajen: SEFOPE arkivu.