Indonézia Hakarak Koopera ho TL Promove Setór Turizmu Arte-Kultura

BELU: Liu husi Festival Cross Border Tourism Governu Indonézia hakarak atu koopera ho Governu Timor-Leste hodi promove setór turizmu no arte-kultura entre rai rua ne’e.

Kultura populasaun Indonézia, liuliu sira ne’ebé lokaliza iha área fronteira terrestres Timor-Leste nian laiha diferensa dook, tanba ne’e nu’udar eventu ida hodi hametin nafatin lasu amizade populasaun rai rua ne’e nian.

Nune’e, kooperasaun ne’e inisia atu atrai turista husi estranjeiru, nune’e bele fó benefísiu ba nasaun viziñu rua ne’e através eventu arte-kultura no mós turizmu lokál.

Governu Indonézia rasik kria atividade Festival Cross Border Tourism ho alvu ida oinsá atu dada atensaun turista nasaun viziñu sira hanesan Timor-Leste no Austrália hodi hametin setór turizmu.

Ministru Turizmu Indonézia, Arief Yahya, ne’ebé partisipa diretamente iha eventu ne’e hateten, kooperasaun bilaterál Indonézia ho Timor-Leste iha área ne’e foka liu ba setór turizmu no arte-kultura.

“Kultura Belu no Timor-Leste laiha diferensa dook ne’ebé bele sai lasu entre nasaun rua ne’e hodi hametin mós kooperasaun iha setór komérsiu no investimentu”, dehan Ministru Yahya, bainhira partisipa Festival Cross Border iha Simpang Lima, BeluAtambua, Nusa Tenggara Timur (NTT), foin lalais ne’e.

Tuir nia, bainhira relasaun povu ho povu la’o di'ak ona, automatikamente sei eleva kooperasaun iha área sira seluk. Ne’e duni, presiza atu hahú husi setór turizmu no arte-kultura nian.

La’ós ne’e de’it, tuir planu, sei promove mós sport tourism (desportu turizmu) nian iha área fronteira. Nune’e, populasaun iha nasaun rua ne’e bele esplora mós area desportu sira.

Iha vizita ne’e Ministru Turizmu Indonezia mos inaugura Destinasi Digital no Abertura Festival Wonderful Indonesia, iha Tasi-Ibun Rai Henek Mutin, Suku Kenebibi, Atapupu.

Festival Cross Border Tourism tama ba kategoria 100 wonderful event CoE 2018 hala'o iha Belu-Atambua, Nusa Tenggara Timur (NTT) durante loron rua (4-5/10) ho eventu oioin, hanesan Festival Fulan Fehan no mós konsertu Cross Border, ne’ebé harame husi kantora Indonesian Idol 2017, Maria Simorangkir, artista lokál no mós dansa kulturál.

Entretantu, Administradór Distritu Belu-NTT, Willybrodus Lay hateten, eventu lubuk ida ne’ebé hala'o iha Belu-Atambua nu’udar maneira ida hodi hametin lasu amizade entre populasaun viziñu iha nasaun rua ne’e.

Tanba ne’e, Governu Indonézia kontinua konvida nafatin populasaun Timor-Leste nian atu hola parte mós iha eventu hirak ne’e hala'o iha fronteira rai rua ne’e nian.

Atu hametin lasu amizade ne’e, Governu Indonézia mós hanoin ona oinsá koopera ho Governu Timor-Leste atu kria atividade desportu turizmu. Prinsipalmente sei envolve área desportu sira hotu hodi bele atrai mós turista sira husi estranjeiru.

Área hirak ne’ebé Indonézia hakarak atu haree hamutuk ho Timor-Leste maka oinsá bele hamutuk hodi haree hikas mekanizmu burokrasia atu hakat husi fronteira, ne’ebé durante ne’e bele mós sai hanesan dezafiu ida atu atrai turista sira.

Eujevio da Silva | Independente