Governu Hato’o Sentidu Kondolénsias Família Matebian Iha Kuluhun

DILI, (TATOLI) – Governu liuhosi Ministru Defeza no Seguransa, Filomeno Paixão hato’o sentidu kondolénsias ba família vítima sira iha Kuluhun kraik, tanba trajédia ne’e ema hotu la espera ka la iha ema ida mak planeia no la iha ema ida mak hakarak akontese asaun ne’e.

“Ha’u lori governu nia naran hato’o sentidu kondolénsias ba família vítima. Tanba trajédia ne’e ita hotu la espera, la iha ema ida planeia no la iha ema ida mak hakarak situasaun ne’e mosu,” hato’o Ministru Defeza no Seguransa, Filomeno Paixão ba jornalista sira hafoin hasoru malu ho Primeiru Ministru, Taur Matan Ruak iha Palásiu Governu, ohin.

Filomeno Paixão alerta ba públiku liuliu família vítima sira atu ulun malirin hodi submete kazu ne’e ba prosesu justisa. Nia promete situasaun ne’ebé daudaun família enfrenta tenke rezolve ho ulun malirin, parte governu sei tuur hamutuk ho família vítima sira hodi ko’alia haloot vítima sira nia isin, hafoin tuir mai mak fó asisténsia ba família vítima sira.

Nu’udar ministru Defeza no Seguransa, nia konsidera trajédia Kuluhun ne’e mosu la’ós sistemátiku. Momentu ne’e, polisia na’in haat mak iha ne’ebá (Kuluhun), no oknum polisia na’in rua de’it mak halo asaun.

“Investigasaun mak foin hatene loloos kazu ne’e nia hun.” Ministru esplika.

“Ita hatene katak sira agora dezarmadu iha sela, investigasaun ne’e hotu mak prokuradoria Jerál Repúblika sei hato’o ba tribunál atu halo desizaun ba kazu ne’e.”

Parte seluk, Komandante Jerál Polisia Nasionál Timor-Leste (PNTL), Julio da Costa Hornay, husu nafatin ba ema hotu atu mantein estabilidade no pás, nune’e Timor-Leste bele iha situasaun ne’ebé hakmatek.

Komandante mós lori instituisaun PNTL nia naran hato’o deskulpa ba família matebian sira, no tiru hosi oknum PNTL hanesan illegal no la tuir lei ho orden.

Entretantu, suspeitu na’in hat (polisia) ohin loro kraik ne’e, tuir ona prosesu primeiru interrogatóriu iha Tribunál Distritál Dili, ba akontesimentu mak Iha loron Domingu, 18 Novembru 2018, iha Aldeia Kulu hun Kraik, Suku Akadirun, Postu Administrativu Nain Feto no Munisípiu Dili.

Tuir informasaun ne’ebé TATOLI rekolla hosi parte vítima haktuir, akontesimentu ne’e iha mais ou menus iha oras 1:45 madrugada iha diskusaun entre joven na’in rua iha festa laran, Joanico Baptista Carvalho mak hakalma, iha diskusaun ne’e seidauk iha krime ruma akontese iha festa maibé derrepente de’it kilat tarutu dala hira no nia (Joanico Baptista Carvalho) dudu sees tiha joven ohin halo diskusaun.

Oknum polisia Chiquito ka koñesidu pai Quito Panglima ne’e hanesan festa na’in no oknum Polisia José Mina hanesan kolega di’ak, autór na’in rua ne’e mós partisipa festa katak sira na’in rua mak responsabiliza ba seguransa maibé ikus mai oknum polisia na’in rua ne’e mak sai autór ba krime ne’e.

Trajédia ne’e akontese iha momentu koremetan ba matebian João (Aduan), hosi akontesimentu ne’e vítima sira ne’ebé hakotu ona iis mak hanesan Vítima Erick Joni Robertus Bria, vítima Luis Kevin Saldanha Belo inklui vítima Leonildo Eduardo Ximenes Sequeira. Enkuantu kanek hirak ami família tolu labele koalia, balun grave iha Ospitál Nasionál Guidu Valadares.

Iha parte seluk tuir informasaun ne’ebé TATOLI rekolla hosi parte Ospitál haktuir, mate isin ne’ebé mak agora iha mortuario hamutuk na’in 3. Vitima ne’ebé mak sei moris e agora baixa hela iha Hospital Nasionál Guido Valdares  hamutuk na’in 3, ne’ebé ida baixa hela iha ICU, e na’in 2 iha hela salaun Cirurgia, no na’in 2 fali alta tiha ona husi hospital horisehik.

Jornalista: Zezito Silva | Editór: Manuel Pinto