DILI, (TATOLI) - Prezidente
Repúblika, Francisco Guterres Lú Olo, hateten sosiedade sivíl ida forte,
kooperante ho governu, sei fó kbiit boot liu ba ema hotu, laós de’it atu
identifika problemas no dezafius, maibé atu analiza mós situasaun, halo
previzaun loloos no hetan nafatin solusaun ba problemas ohin no aban-bainrua
nian.
“Imi ho ha’u hanoin katak povu
nia moris-di’ak tenke sai preokupsaun ba ita hotu-hotu. Se ita-nia povu la
moris di’ak, ida nee signifika katak Estadu Timor-Leste seidauk kumpri ho di’ak
ninia funsaun. Signifika demokrasia laiha folin,” nia dehan bainhira halo
abertura ba Enkontru Jerál Anuál Forum ONG Timor-Leste (FONGTIL) 2018 iha
salaun Parokiál São José, Katedral, Vila Verde, segunda ne’e.
“Horiuluk ita-nia ema la hanoin
moris iha rai-liur. Ita laiha tradisaun buka moris di ak liu, iha rai seluk.
Funu mak obriga ita-nia ema barak sai ba rai-liur. Ohin loron, ita haree joven
rihun ba rihun mak sai ba rai-liur. Biar sira kontribui makaas ba
dezenvolvimentu ho osan ne’ebé sira haruka mai família iha Timor-Leste,
situasaun ida nee obriga ita rekoñese katak ita hasoru problema boot ida,
problema dezempregu,” Lú Olo haktuir.
Problema ida ne’e, tuir
Prezidente Repúblika, afeta maka’as ba maioria povu Timor-Leste no maioria ne’e
mak joven sira ho otas 35 ba kraik, nune’e, husu organizasaun sosiedade sivíl
atu ajuda Governu haree oinsá rezolve problema ida-ne’e.
“Iha ona inisiativa hosi UNDP
harii Knua Juventude Fila Liman, nu udar sentru Juventude integradu ida ba
inovasaun no empreendorismu. Atus haat mak simu ona formasaun nu udar
empreendedór no balun halao ona negósiu rasik. Ne’e duni, organizasaun sosiedade
sivíl bele mobiliza tan joven sira seluk atu tuir formasaun kona-ba oinsá halo
negósiu rasik ho susesu,” nia tenik.
Liuhusi dalan kria empregu ba
ninia án rasik, nia informa, joven ida-idak sei dezenvolve ninia talentu no
matenek atu hamosu produtu foun no hetan rendimentu ba ninia moris no família
sira-nian.
“Ha’u husu mós organizasaun
sosiedade sivíl atu ajuda hamoris no haforsa valór sira hanesan onestidade,
respeitu no domin ba malu, nu’udar sidadaun no membru família. Bainhira ita
kuda beibeik valór morál iha ida-idak ninia fuan no iha ita-nia uma laran,
ita-nia sosiedade tomak bele moris ho pás, armonia no estabilidade,” Lú Olo
dehan.
Nia sujere ba sosiedade sivíl
kontribui ba área sira hanesan agrikultura, edukasaun, saúde, justisa, programa
kontra violénsia hasoru feto no labarik, programa hakbiit feto, programa ba ema
ho defisiénsia, dezenvolvimentu turizmu iha rai-laran no seluk tan hodi bele
tulun governu atinji meta moris-di’ak ba povu doben ida-ne’e.
“Ha’u husu organizasaun sosiedade
sivíl atu koopera nafatin ho Governu Timor-Leste, atu hakbiit povu oinsá halo
kontrolu sosiál ho di’ak no apoia Programa Governasaun di’ak. Ha’u hein no fiar
katak organizasaun sosiedade sivíl sira sei kontinua hala’o nafatin programa
sira iha munisípiu hotu-hotu,” Xefe Estadu propoin.
Kada tinan, FONGTIL hala’o
enkontru jerál anuál hodi asegura no garante transparénsia no responsabilidade,
nu’udar entidade-mahon ida ho interese públiku ba interese públiku. Enkontru
jerál anuál fó mós oportunidade ba organizasaun-membru sira hodi envolve-án iha
prosesu fó hanoin konstrutivu no foti desizaun iha nível koordenasaun ás liu,
hodi haburas no hametin liu-tan FONGTIL nia kna’ar husi ámbitu kooperasaun
institusionál ba interese públiku.
Organizasaun sosiedade sivíl
hatúr-án ho autonomia rasik ho funsaun prinsipál tolu maka hanesan advokasia ka
sosializasaun, empoderamentu ka hakbiit no fiskalizasaun hosi sosiedade sivíl
atu garante demokrasia la’o tuir dalan loos.
Jornalista: Xisto Freitas | Editór:
Manuel Pinto
Imajen: Prezidente Repúblika,
Francisco Guterres Lú Olo. Foto António Goncalves
Sem comentários:
Enviar um comentário