Konsellu Imprensa Preokupa Ho Redasaun RTTL,ep

DILI, (TATOLI) – Konsellu Imprensa (KI) sente preokupa ho redasaun Radio Televizaun Timor-Leste (RTTL), empreza públiku (ep), bazeia ba keixa hosi jornalista nian, katak; iha intervensaun polítika no ekonomia iha instituisaun refere.

Prezidente Konsellu Imprensa (KI), Virgílio da Silva Guterres mós observa, iha intervensaun ba sala redasaun makas tebes.

“Durante ne’e KI akompaña RTTL,ep, hafoin iha mudansa ba ninia lideransa iha Konsellu Administrasaun nian, intervensaun ba sala redasaun makas tebes. Iha assessor balun ne’ebé mak ba to’o sala redasaun, atu muda news alignment,” Virgílio da Silva Guterres fó sai iha konferénsia imprensa ne’ebé realiza iha edifísiu Konsellu Imprensa, Kinta Boor, ohin.

Iróniku liu tan, nia dehan, assessor mak tun fali ba redasaun, halo netik fali xefe redasaun nia servisu. Ezemplu; pakote reportajen ne’ebé mak jornalista sira prepara ona, no hein atu públika, ne’ebé tuir loloos xefe redasaun mak atu hola desizaun, la akontese, assessor mak tun fali ba redasaun.

Alende KI halo observasaun, iha tan keixa ne’ebé levanta hosi jornalista sira ho organizasaun professional balun. Hotu-hotu preokupa ba asuntu rua; ida mak intervensaun polítika, no ida seluk intervensaun ekonómika iha sala redasaun.

“Ida ne’e mak sai preokupasaun Konsellu Imprensa nian.”

Tuir Prezidente KI nia hatene, atu hasai notísia ida ou lae, xefe redasaun mak atu fó ninia desizaun ikus katak atu hasai ou lae.

Kuandu Assesor mak tun ba redasaun hodi hola desizaun no hasai notísia tuir assessor ne’e nia hakarak to’o titip pergunta ba jornalista sira hodi hato’o ba fontes, ida ne’e konsidera hanesan violasaun.

“Iha jornalizmu bele dehan krime hasoru públiku, tanba ne’e Konsellu Imprensa preokupa,” Prezidente KI, Virgílio afirma.

Hodi husu ba órgaun governu kompetente (Sekretáriu Estadu Komunikasaun Sosiál) atu hare situasaun iha RTTL,ep, ba futuru KI iha vontade nafatin koopera ho lideransa foun RTTL,ep.

Iha parte seluk, Prezidente Konsellu Administrasaun RTTL,ep, Francisco da Silva Gary, rekoñese katak, parte sira nia simu ona notifikasaun hosi Konsellu Imprensa kona ba preokupasaun konsellu, no jornalista sira nian.

“Ita simu notifikasaun hosi konsellu Imprensa, kona ba infrasaun ne’ebé ita iha. Ita hakarak sira (KI) hala’o nia knaar, RTTL sei hadi’a infrasaun sira ne’e,” Gary esplika.

Lori Konsellu Administrasaun RTTL,ep, nia naran, Garry husu ba konsellu Imprensa atu kontinua akompaña dezenvolvimentu mídia tuir KI nia papél, nune’e instituisaun mídia sira hanesan RTTL,ep no seluk tan bele hadi’ak nia an hodi serve informasaun ba públiku.

“Ita husu ba KI atu haree media hotu-hotu, la bele haree balun (RTTL,ep), e balun husik hela nafatin,” Prezidente Gary hato’o nia mensajen.

Antes ne’e, Sekretáriu Estadu Komunikasaun Sosiál, Merício Juvenal dos Reis Akara kontinua fó korajen  katak governu garante liberdade imprensa ba jornalista sira tuir lei inan hateten.

“Asosiasaun jornalista sira iha direitu hato’o reklamasaun ba asuntu A to’o Z, maibé dalan mak tenke kestiona liuhosi Konsellu Imprensa hodi buka dadus no investiga ho loloos, liberdade redasaun to’o agora laiha buat ida, tanba laiha ema ida mak bandu no halo intervensaun”, katak.

Nune’e, governnate ne’e husu ba jornalista sira no media sira atu mantein independénsia, labele monu ba lasu polítiku husi pesoál no grupu sira nia interese.

Entretantu observasaun Tatoli nia ba konferénsia imprensa, Prezidente KI lá mensiona, infrasaun iha RTTL,ep komete hosi asesór ida ne’ebé.

Jornalista: Julia Chatarina | Editór: Manuel Pinto

Imajen: Prezidente Konsellu Imprensa, Virgilio Guterres