Pasajeiru preokupa ho kondisaun ró Nakroma

DÍLI - Kondisaun Ró Berlin Nakroma ohin loron sai preokupasaun boot ba Pasajeiru tanba kondisaun no fasilidade ró Berlin la favoravél no husu ba Governu Timor-Leste liu-liu husi Ministériu Transporte no Komunikasaun atu rezolve proekupasaun refere.

Pasajeiru sira preokupa tanba kondisaun ró wainhira pasajeiru sira sae dois maka’as hodi fo impaktu ba pasajeiru sira wainhira iha Berlin nia laran, mosu iss (dois) tanba lahetan kuidadu husi servisu nain sira tanba ne’e presiza hetan atensaun nune’e labele fo impaktu ba saude pasajeiru sira.

Tuir pasajeiru Berlin Nakroma Liliana da Silva haktuir, katak Ró Nakroma maske foin lalais governu haruka hodi halo manutensaun iha Indonesia no fila seidauk tinan ida maibe kondisaun ro nakunu ho foer inklui domina ho iis foer nian ne’ebé maka’as tebes.

“Foin maka ba hadia iha Indonesia seidauk to’o tinan tanba sa maka la haree kondisaun Ró nian, Ró foer tebes iis makas loos, halo ami tur la diak, taka ibun to’o sai husi ró laran”, Konta tuir nia ba jornalista BT iha Portu Díli (26/01/2019). Liliana dehan ró nia laran presiza mós hodi nune’e la bele fó efeitu negativu ba saúde pasajeiru sira bainhira utiliza ró refere ba paseu ba Atauro no halo viajen ba Oe-Cusse.

“Ami presiza fasilidade moos de’it tanba ba Atauro han oras ne’ebé presiza mós hodi nune’e ami bele sente fresku iha ró laran, ida ne’e la’e iis maka’as los, halo tur iha ró laran sente atu muta, ha’u sente ida ne’e akontese tiha ona maibé la iha ema ida maka atu rezolve proekupasaun ida ne’e,” tenik nia. Iha fatin hanesan, Filomeno Fernandes, haktuir katak, ró refere la’ós de’it timoroan maka sa’e maibé ema estranjeirus mós sa’e ho ida ne’e nia sente moe ho ambiente ró nian ne’ebé iha.

“Ró ida ne’e la’ós de’it ita maka sa’e maibé malae mós sa’e hotu iha ró ne’e, sente moe tebes bainhira ró ne’e iis maka’as hanesan ne’e, la’ós de’it ró maka is maibé pasajeiru balun mós fuma fali iha laran, ha’u la hatene Governu bandu ida ne’e ka la’e maibé ema ida ne’ebé la gosta sigaru iis ne’e sente la diak,”nia dehan. Tan ne’e nia ejiji atu ró tenke iha fasilidade ne’ebé diak tanba pasaeiru sira sae uza osan hodi hola tiketi tan ne’e kondisaun tenke favoravel no ambiente tenke mo’os.

“Kondisaun Ró laran la favoravél oinsa mak ema gosta sa’e Ró ho kondisaun hanesan ne’e, Governu presiza kontrola kondisaun Ró nian la’ós de’it ba ekipamentu maibé haree mós ba ninia kebersihan tanba ema sa’e Ró selu karun importante tenki mós hodi ema bele sente nyaman, Ró ne’e mós foin maka hadia hotu seidauk to‘o tinan tanba sa kondisaun hanesan nene’e,” kestiona nia.

Ró Berlin Nakroma ne’ebé foin lalais iha tinan kotuk ba halo manutensaun durante fulan rua iha Semaran (Indonesia), no remata iha loron (12/08/2018), durante halo manutensaun Governu hasai Orsamentu hamutuk $270 Milloens. Iha loron (14/08/2018) Ministru Transporte I Komunikasaun, José Agostinho, informa ba jornalista sira katak iha futuru mai politika ministeriú nian oinsa maka investe hodi kria kondisaun ida ne’ebé diak ba rai laran, hanesan fatin ka kondisaun Ró. Ho situasaun refere oras ne’e dadaun Governu Timor Leste hahu halo poupa hodi investe fali ba iha necesidade seluk hanesan setór produktivu sira hodi kria kondisaun diak ba povo Timor tomak. (BT)

Hakerek nain Venia | Business Timor