Sona Feen Kiik iha Edifisiu Prokurador, Feen Boot Tama Sela

DILI: Emosaun mosu la koñese fatin. Teki-teki mosu hodi domina hanoin no ikus mai hamosu asaun ne’ebé bele kria tan problema seluk. Kazu ida ne’e mak akontese ba feto ida ho inisial OJA, ne’ebé tenke toba iha sela polisia tanba la konsege kontrola nia emosaun.

Ho intensaun atu ba rezolve problema familia nian iha Prokuradoria Munisipiu Dili, OJA ne’ebé sai nu’udar feen boot uza lapizera hodi sona MC (22) ne’ebé nu’udar feen kiik nia matan-fukun kuanan. Kazu ne’e sai aat liu tan tanba OJA halo asaun ne’e iha Prokuradór ida nia oin.

OJA ho nia laen, bolu de’it MR ho MC hasoru-malu iha Prokurador Munisipiu Dili iha Segunda (28/01) tanba simu notifikasaun atu rezolve sira-nia problema. Tuku 09.00 de’it OJA iha ona edifisiu prokuardor hodi hein nia laen ho MC.

Bainhira nia hateke hetan MR ho MC tuun husi karreta, OJA hakat uluk ba edifisu laran tan lakohi haree sira-nia oin. Tanba nia sei sente triste no laran moras.

Maske fuan moras OJA tahan an nafatin atu emosaun labele domina nia fuan. Maibé, nia raan nakali bainhira nia haree MC halo fitas ba nia. OJA hakat besik ba sira hodi tarata MC. Nune’e feto na’in rua ne’e hahú halikar malu.

Ho nervozu OJA ne’ebé kaer hela lapizera fai kedas ba MC nia matan fukun kuanan ne’ebé resulta MC nia matan fukun hetan kanek kiik. Polisia ne’ebé halo serbisu iha fatin ne’ebá kaer kedan OJA.

“Ha’u sala saida. Ha’u nunka halo a’at hasoru nia (MC) tansa nia halo hanesan ne’e mai ha’u?,” dehan OJA ho mata-been iha edifisiu komando Polisia Kaikoli, Kinta (31/01).

Iha fatin hanesan, Komandante Daruak Polisia Munisipiu Dili, Superintendenti Asistente Euclides Belo dehan kazu ne’e kategoria nu’udar agresaun fiziku simples maibé nia efeitu boot.

Nia dehan, buat hotu regula iha lei tan ne’e atu nervozu to’o iha ne’ebé de’it mós tenke esforsu an atu emosaun labele domina hanoin.

Molok ne’e, OJA sai nu’udar vitima ba nia laen nia hahalok no prokuradór notifika sira atu ba rezolve problema ne’ebé iha, maibé molok rezolve problema OJA sai fali suspeitu ba kazu agresaun fiziku.

Entretantu, iha Kinta horisehik tuku 17:00 polisia aprejenta suspeitu OJA ba Tribunal Munisipiu Dili hodi submete ba prosesu interogatoriu dahuluk.

Tomé Amado | Independente