Husi: Cristina Ximenes*
DILI: Organizasaun
Naun-governamental (ONG) La’o Hamutuk (LH) konsidera Prezidente Repúblika
nu’udar aman ba nasaun presiza hatene dokumentu ofisial kona-ba sosa asaun
ConocoPhillips no Shell Energy.
Koordenadór LH Celestino Gusmão hato’o kestaun
ne’e relasiona ho deklarasaun husi PR Francisco Guterres Lu Olo ne’ebé hatete,
nia parte to’o ohin seidauk simu dokumentus ofisial husi governu konaba sosa
asaun ConocoPhillips no Shell Energy. Maske públiku hatene katak prosesu sosa
asaun ne’e remata ona.
"Ha'u hanoin sosa partisipasaun iha konsorsiu
projetu petroliferu Greater Sunrise ne'e parte husi atividade estadu nian,
ne’ebé governu mak simu tarefas sira ne'e, entaun loloos karik Primeiru
Ministru, Prezidente Tribunàl tenke hasoru malu kada semana relata serbisu ba
Prezidente Repúblika, informa mós ba Prezidente Repúblika. Kona-ba dokumentus
legais sira ne'ebé governu halo relasaun ho kazu ida ne'e Prezidente Repúblika
presiza hatene," dehan Koordenadór La'o Hamutuk ba jornál INDEPEDENTE iha
nia kna'ar fatin, Sesta (26/04).
Tuir Celestino, ba asuntu sosa no fa’an asaun
ConocoPhillips no Shell Energy foin nota intendimentu ida (MoU) ne’ebé asina
husi Timor Gap ho kompaña rua.
Tan ne’e, nia parte husu mós ba governu atu bele
esplika no fó sai kona-ba kontratu sosa no fa’an ne’e iha ona ka lae. “La
hatene loos iha ka lae kontratu (kona-ba sosa asaun). Antes ne’e mós la públika
(MoU sosa asaun) tanba ne'e La'o Hamutuk la hatene Prezidente Repúblika iha
kopia ka la'e, maibé Lao Hamutuk rasik dala-barak husu ba autoridade sira
ne'ebé serbisu iha setór petrolifeira, sira la fó to'o agora,” dehan nia.
"Dokumentus foin lalais ida selu ne'e mós seidauk disponivel iha publiku
entaun Prezidente Repúblika hanesan aman ba nasaun, lider ba nasaun tomak nian,
presiza akompañia investimentu sira estadu nian.”
Sa tan, nia hatutan, investimentu
ida ne'e inklui osan boot, rekursus, no enerjia boot tebes. Tan ne’e loloos
Prezidente Repúblika, sosiadade sivil no povu Timor Leste tomak presiza hatene
detallu buat hotu-hotu ne'ebé la'o.
Molok ne’e, Prezidente Repúblika (PR)
Francisco Guterres Lú Olo deklara to’o agora nia seidauk simu dokumentu ofisial
kona-ba Governu Timor-Leste sosa asaun ConocoPhillips no Shell Energy.
PR Lú
Olo dehan, to’o agora nia rona de’it informasaun husi media katak governu sosa
ona asaun husi kompañia rua ne’e, hodi sai na'in ba proprietária Kampu Greater
Sunrise.
Maske nune’e, PR Lu Olo hatete nia orgullu no sei hein governu atu
aprezenta dokumentu ba nia.
“Ha'u rona de’it informasaun husi media sira, maibé
ha'u la hatene entaun ha'u la halo komentáriu kona-ba ida ne'e, bainhira ha'u
rona ona husi dokumentu ofisiál ruma mak ha'u bele ko'alia,” dehan Prezidente
Lú Olo ba jornalista sira iha Kristu Rei bainhira partisipa serimónia
ANZAC-Day, Kinta (25/4/).
Maske deklara seidauk simu dokumentu ofisial, maibé
Xefe Estadu ne’e konsidera akordu sosa asaun ne’ebé governu TL asina ho kompaña
Conoco no Shell iha Singapura iha 16 Abril foin lalais nu’udar akordu
importante hodi hein prosesu tomak atu dada kadoras mai TL.
“Projeitu ne'e prepara
tiha ona iha tinan hirak liu bá, par bele fó benefísiu ba povu. Ha'u hakarak
hatete katak ita hein prosesu sira ne'e,” dehan PR Lu Olo.
*Cristina Ximanes | Independente
Sem comentários:
Enviar um comentário