Xanana Gusmão admiti sobu partidu ne'ebé nia lidera

Xanana Gusmão husu ba militante sira hosi Congresso Nacional da Reconstrução Timorense (CNRT), forsa polítika boot hosi koligasaun hosi Governu timoroan nian, reflesaun ida kona-ba futuru partidu nian, ne'ebé nia lidera, hodi admiti posibilidade hodi sobu. 

"Partidu tenki halo reflesaun forte ida. Kuadru sira ho militante sira tenki analiza étika polítika, kona-ba manobra oioin, propaganda sira ne'ebé mosu, hodi komprende di'ak ema sira ne'ebé kaer nasaun, no sira nia vizaun ho komportamentu polítiku sira", nia hatete iha mensajen ida ba partidu durante findesemana ne'e.

"Saida maka akontese iha partidu tenki analiza duni hanesan lisaun ida ba partidu", nia hatete iha mensajen ida iha vídeo ne'ebé grava ho okaziaun hosi tinan 12 hosi Congresso Nacional da Reconstrução Timorense (CNRT).

Ba Xanana Gusmão, mudansa sira ne'ebé akontese iha Timor-Leste entre tinan 2007 no 2017 - ho aumentu hosi investimentu privadu ho ekonomia ida ne'ebé metin liu - "laiha valorizasaun" ho partidu hetan beibeik akuzasaun hanesan "partidu koruptu ida, ne'ebé naok dolar millaun resin ba Estadu, no buat hotu ne'ebé CNRT halo hanesan sala".

Iha tinan 2017, bainhira CNRT lakon lejislativu sira "povu hatudu ona katak la fiar iha CNRT", maibé "lisaun" seidauk komprende tomak hosi partidu, nia hatete.

"Tanba ne'e, kompañeiru sira, partidu tenki aprende liuhosi lisaun sira ne'e, hodi la konfia organizasaun sira seluk arbiru de'it, ema ida-idak iha sira nia interese rasik", nia hatete.

"Partidu tenki konsidera hodi ko'alia klean liu kona-ba nia futuru. Bainhira CNRT promove de'it korupsaun, bainhira ema sira no ema ruma hosi CNRT maka hanesan koruptu, bainhira presiza atu salva nasaun, entaun di'ak liu duni maka taka, sobu partidu", nia afirma.

Tanba ne'e, Xanana Gusmão husu atu membru sira hosi partidu foka iha problema internu sira, husik "troka akuzasaun sira, troka inveja sira no hanoin de'it iha interese pesoal sira", hanesan nia afirma katak akontese daudaun.

"Ema balun sente suspeitu ona... hanesan veteranu sira ho veterana sira iha partidu. Kompañeiru sira seluk haluha defende ona direitu sira partidu nian no halo ona katak partidu maka fó tulun ba sira", nia hatete.

"Bainhira ita hakarak konsolida partidu, ita tenki hahú iha autokrítika honestu ida no franku iha partidu nia laran. Bainhira ita la hanoin di'ak iha partidu nia futuru, iha eleisaun oinmai ita sei lakon fali, no ita tenki esforsa iha tinan hirak tuirmai hodi selu tusan sira kampaña nian. Ita tenki hanoin di'ak iha partidu nia futuru, tanba ne'e tenki aguenta buat hotu", nia subliña.

Xanana Gusmão nia mensajen grava ona iha semana liubá no fahe ona hosi lideransa ho militante sira CNRT nian durante findesemana, hodi komemora tinan 12 kriasaun hosi partidu nian.

Fonte hosi CNRT esplika ona ba Lusa katak objetivu maka divulga mensajen iha nível nasional antes konferénsia nasional ida ne'ebé seidauk defini nia loron.

Iha kuaze minutu 26 nia laran, Xanana Gusmão refere ona katak CNRT aparese iha tinan 2007 "hodi rezolve krizi boot ne'ebé maka ema timoroan sira haketak malu, vinga malu, halo aat ba malu, to'o iha ema mate".

Referénsia ida ba krizi ne'ebé akontese iha Timor-Leste entre tinan 2006 ho 2008 no tinan hirak tuirmai ne'ebé, nia garante, Governu Aliansa hosi Maioria Parlamentar (AMP) ne'ebé serbisu ona hodi hadi'a instituisaun sira Estadu nian no hodi "estabelese sistema finanseiru ida di'ak ho modernu" iha nasaun.

"Buka ona apoia empreza lokal sira hodi dezenvolve aan hodi dezenvolve área privadu nasional, buka hamosu ona despartidarizasaun ho funsionalizmu públiku, buka fó vizaun luan ida ba ema tomak kona-ba oinsá dezenvolve ita nia nasaun", nia hatete.

Eletrifikasaun hosi nasaun, esforsu ida hodi "hadi'a hahalok hosi empreza nasional sira iha implementasaun hosi projetu sira ho obra sira" no hodi hadi'a "inefisiénsia sira iha instituisaun sira Estadu nian liuliu iha Governu".

Nia esplika lista sira hosi konkista sira ne'ebé inklui, entre lista sira seluk, koresaun iha jestaun hosi apoiu ba parseiru internasional sira Timor-Leste nian no kriasaun hosi G7+ (organizasaun intergovernamental ida ne'ebé halibur nasaun sira ne'ebé hasoru konflitu ativu sira ka sira ne'ebé iha esperiénsia foun hosi konflitu no frajilidade nian).

"CNRT la'ós dehan nia maka halo buat hotu; CNRT lakohi bolu atensaun ba povu tomak hodi avalia mudansa sira dezde tinan 2007 to'o tinan 2017. Bainhira laiha diferensa sira, entaun CNRT asumi frakasu ne'e", nia hatete.

Bainhira iha diferensa, "maski ki'ik", Xanana Gusmão hatete katak CNRT "la halo buat hotu mesak" no tanba ne'e nia rekorda partidu sira ne'ebé halo ona parte iha koligasaun hosi Governu dahaat no dalima no ba Fretilin rasik.

"Partidu ida, ne'ebé aseita apoia ona Governu dahaat hodi bele halibur esforsu sira, ho propózitu úniku, no nune'e hetan vitória boot ida kona-ba Austrália, ho respeitu ba fronteira tasi sira ne'e, hodi nune'e ita bele sai soberanu iha ita nia rikusoin sira", nia hatete.

"Obrigadu ba Fretilin tanba hamutuk ho CNRT hodi defende interese nasional liu interese hosi partidu ida-idak", nia afirma ona.

Iha diskursu, Xanana Gusmão hanoin hikas ideia katak CNRT tenki aprende ho lisaun sira hosi prosesu konstrusaun Estadu nian, hodi haree ba saida maka akontese ona ho sinseridade, honestidade ho abertura hodi "rekoñese frakeza interna sira".

"Ne'e hanesan importante ba partidu, tanba bainhira ita la analiza aspetu sira ne'e, ita laiha konsiénsia hodi hadi'a partidu, ita la senti nesesidade hodi hadi'a ita nia hahalok rasik, hanesan membru sira hosi kuadru ho hanesan militante", nia hatete.

"Bainhira ita la halo introspesaun, bainhira ita hakarak troka de'it akuzasaun sira, bainhira ita eziji de'it ita nia direitu sira no ita haluha katak iha kuadru sira iha partidu nia laran ita iha mós knaar sira ho nasaun", nia afirma.

Nia hatete katak Timor-Leste sei moris iha "situasaun polítika konfuzu ida", hafoin eleisaun rua, iha tinan 2017 ho 2018 ne'ebé hatudu frajilidade hosi Estadu no nia instituisaun sira, "dezde Prezidente Repúblika to'o Parlamentu, dezde Governu to'o tribunal sira no setór tomak hos Justisa".

Iha kapítulu Justisa nian, Xanana Gusmão hatete hodi ironiza katak membru tomak hosi partidu, inklui nia rasik, "tenki hahú simu "akuzasaun sira hosi tribunal sira", ho justisa ida "ne'ebé prende ona ema barak iha CNRT" no ne'ebé "buka nafatin ema sira hosi CNRT, maski hanesan kulpadu ka la'e".

Lusa | SAPO TL