Subornu Akontese Tanba Ema Hatene Atividade Ne’e Ilegál

DILI, 29 abr 2019 (TATOLI) - Diretór Jerál Autoridade Aduaneira, José António Fátima Abílio, hateten, ema halo subornu tanba hatene katak atividade ne’e ilegál, entaun oinsá atu halo livre nia sasán.

“Buat ida subornu ne’e akontese, simu ka la simu fila ba integridade ema ida-idak nian. Ba ajente sé de’it ne’ebé maka hala’o servisu iha fronteira liuliu ligasaun ho esportasaun no importasaun integridade ne’e maka importante ba nia”, José António Fátima Abílio, afirma iha edifísiu Alfándega, ohin, iha área Palásiu Governu nian.

Tuir José António Fátima Abílio, bainhira hala’o servisu ida, sente dehan servisu ne’e iha duni responsabilidade, tenke fó duni benefísiu ba Estadu, ba povu ida ne’e, entaun tenke halo atuasaun mós tuir regra ne’ebé maka iha.

Bainhira ema mai ho dokumentu kompletu, prontu lori nia sasán sai nia selu taxa, mas José António Fátima Abílio, afirma tan, mai la tuir tenke sujeita ba irregularidade, in kumprimentu ne’ebé lakohi tuir prosedimentu legál sira ne’e, entaun ida ne’e maka tenke simu duni desizaun saida maka hetan liuhosi operasaun konjunta ka’er.

Nia esplika, subornu depende ba ema tanba ida seluk tenta atu fomenta, agora ida seluk ne’ebé maka implementa lei nia mós tenke firme katak ne’e kontra lei, mas nia maka hakarak atu simu signifika nia rasik mós fraku, partisipa iha ekonomia ida ilegál ne’e.

“Tanba ne’e maka ho atuasaun hanesan ne’e, akontese subornu ne’e normálmente iha atividade ilegál sira ne’e. Balu akontese tanba momentu ida nia mai, nia enfrenta ona entaun tenta lobby ho dalan ida ne’e no balu kuandu integridade laiha, nia bele iha kedan ona ligasaun entre importadór ne’e maka lori fasilita atividade ilegál sira ne’e”.

Nia konsidera subornu ladi’ak, mentalidade ne’ebé la’ós dezenvolve, la’ós atu hatudu lisaun di’ak ba jerasaun sira tuirmai, maibé mentalidade hakarak destrui.

José Abílio dehan, bainhira simu subornu ne’e nia implikasaun boot tanba buat ne’ebé lori mai ne’e keta iha buat seluk ne’ebé afeta ba komunidade ou joven sira. Tanba ne’e maka bainhira halo atuasaun ne’e tenke tuir lei no regra ne’ebé iha.

Iha operasaun konjunta entre Alfándega ho law enforcement relevante iha 28 Abríl ne’e, bainhira halo apreensaun ba karreta baskulante (truck) ida tula sigarru sticker dirasaun hosi Maliana liu kona Liquiçá mai Dili katak ema tenta fó subornu.

Publikasaun ofisiál hosi pájina Alfándega Timor-Leste relata katak, sasán merkadoria mai hosi Maliana to’o mai Dili livre no ikus ekipa Alfándega halo apreensaun iha Liquiça no iha asaun apreensaun na’in tenta fó osan ba ofisiál AA atu liberta merkadoria, maibé ekipa rejeita hodi prosede ba investigasaun.

Diretór Jerál informa bainhira ekipa halo atuasaun, timoroan ne’ebé lori sasán mai ne’e tenta hodi fó US$500.

Nia salienta, relasiona ho subornu ne’e maka ba ajente funsionáriu públiku tenke servisu ho integridade, dedikasaun no responsabilidade tomak tanba daudaun ne’e halo esforsu hodi implementa regra tuir lei haruka no tuir knaar ne’ebé iha.

“Ezemplu, Alfándega atu proteje fronteira hosi atividade ilegál atu halo mós reseita hodi suporta mákina Estadu tomak no fasilita komérsiu. Tanba ne’e maka instituisaun hotu ne’ebé servisu iha área importasaun no esportasaun tenke servisu ho integridade no iha koordenasaun ba malu”, hateten José Abílio.

Jornalista: Maria Auxiliadora | Editór: Francisco Simões

Imajen: Diretór Jerál Autoridade Aduaneira (AA), José António Fátima Abílio,Imajen/Egas Cristovão