KI Organiza Dili Diálogu Forum ba Daruak

DILI, 9 maiu 2019 (TATOLI) - Conselho de Imprensa Timor-Leste (KI-sigla tetun), ohin, organiza konferénsia internasionál ba daruak nian ne’ebé koñesidu ho naran Dili Diálogu Forum (DDF).

Dili Diálogu Forum ne’e hanesan eventu annual KI nian hodi halo diálogu no fahe esperiénsia entre membru Konsellu Imprensa nian iha rejiaun Sudeste Aziátiku no Pasífiku.

Dili Diálogu Forum ba tinan ne’e ho tema prinsipál  “SOCIAL MEDIA: CHALLENGES OF JOURNALISM AND PRIVACY IN THE MODERN SOCIETY”, ne’ebé sei hala’o durante loron rua (2), hahú hosi kinta-sesta (9-10/5/2019), iha salaun São José, Katedrál, Dili.

Dili Diálogu Forum ba dahuluk nian hala’o iha tinan 2018 iha salaun Ministériu Finansa, Dili, ho tema “Kria Rede Hodi Hametin Mekanizmu ba Auto-regulasaun Mídia iha Rejiaun Sudeste Aziátiku no Pasífika”.

Dili Diálogu Forum  ne’e partisipa hosi órgaun reguladór mídia komunikasaun sosiál sira hosi nasaun Sudeste Aziátiku no Pasífiku, mak  hanesan  Konsellu Imprensa Indonézia, Konsellu Imprensa Tailándia, Konsellu Imprensa Myanmar, Konsellu Imprensa Filipina  no organizasaun jornalista sira na’in hanesan Southeast Asian Press Alliance (SEAPA) ho International Federation of Journalists (IFJ).

Dili Diálogu Forum ba daruak tinan ne’e nian,   konvida mós jornalista seniór na’in rua ne’ebé sai hanesan oradór prinsipál, kompostu hosi  Adelino Gomes, jornalista veteranu hosi Portugal ho Bob Howard, nu’udar Country correspondent for Timor-Leste, Papua New Guinea and Solomon islands for Reporters Sans Frontiers (Paris).

Abertura ba forum internasionál ne’e hala’o hosi Ministru Reforma Lejizlativa no asuntu Parlamentár, Fidelis Leite Magalhães, hodi reprezenta Primeiru-Ministru, Taur Matan Ruak.

Prezidente KI, Virgilio da Silva Guterres ho diretór no reprezentativu UNESCO nia Gabinete iha Jakarta, Shahbaz Khan, hato’o benvindu ba konvidadu sira iha konferénsia ida ne’e nu’udar uma na’in ne’ebé organiza eventu internasionál ba tinan ne’e.

Partisipa mós iha forum internasionál ne’e, jornalista timoroan sira, reprezentante asosiasaun jornalista; Timor-Leste Press Union (TLPU) ho Asosiasaun Jornalista Timor-Leste (AJTL), proprietáriu mídia sira, inklui estudante universitáriu hosi Departamentu Komunikasaun Sosiál hosi Universidade Nasionál Timor Lorosa’e (UNTL) no Universidade Orientál (UNITAL).

Forum internasionál ne’e hetan apoiu hosi Organizasaun Nasaun Unida ba Siénsia no Kultura  (UNESCO-sigla inglés), Embaixada Nova Zelándia iha Timor-Leste, UNDP no Governu Japaun, Embaixada Portugál iha Timor-Leste, AGEH, Otél Timor,  Timor Telecom, Polisia Nasionál Timor-Leste (PNTL) ho mós Ministériu Finansa.

Tuir ajenda ne’ebé iha katak, semináriu internasionál ne’e sei ensera hosi Prezidente Repúblika, Francisco Guterres Lú Olo, sesta lorokraik (10/5/2019), hodi fahe mós prémiu ba jornalista sira no selebra aniversáriu KI nian ba datoluk (10 maiu 2016-10 maiu 2019).

KI nu’udar entidade reguladora, órgaun komunikasaun sosiál iha Timor-Leste ho natureza hanesan entidade administrativa independente, hetan autonomia administrativa, finanseira no iha patrimóniu rasik, no define ho independénsia kona-ba orientasaun ba ninia atividade sira sein sujeita ba kualkér diretriz ka orientasaun hosi podér polítiku.

Jornalista: Francisco Simões | Editór: Xisto Freitas

Imajen: Ministru Reforma Rejizlativu no asuntu Parlamentár, Fidelis Leite Magalhães, hasai foto hamutuk ho membru KI iha eventu DDF 2019, kinta (8/5/2019). Imajen Francisco Simões