Governu timoroan hein ekonomia sai di'ak iha tinan ne'e

Governu timoroan hein atu kondisaun ekonómiku hosi nasaun sai di'ak iha tinan ne'e, ho esforsu hodi normaliza Orsamentu Jeral Estadu nian no avansa ho projetu oioin, hatete hosi ministru Reforma Lejislativu ho Asuntu Parlamentar ba Lusa.

"Ami iha espetativa katak durante tinan ne'e ami sei iha kondisaun ekonómiku ne'ebé di'ak", Fidelis de Magalhães hatete ba Lusa.

"Ami hein hela rezultadu sira hosi estatístika sira hodi haree natureza real hosi kondisaun ekonómiku sira nasaun nian. Maibé, iha tempu hanesan, tanba Governu konsege normaliza ona Orsamentu ho avansa ho projetu sira no halo osan sirkula iha nasaun laran, ha'u fiar katak ekonomia di'ak hela no sei sai di'ak", nia afirma.

Ekonomia timoroan diminui 8% iha 2018, hafoin diminuisaun ida hosi 4,5% iha tinan 2017 no hosi kuaze paralizasaun iha tinan anterior, haktuir informasaun hosi Fundu Monetáriu Internasional (FMI) ne'ebé hein aumentu ida hosi 6,6% iha tinan ne'e.

Relatóriu ida ne'ebé fó sai iha loron-kuarta hatudu katak Produtu Internu Brutu (PIB) hosi área petrolíferu tuun 18,3% iha tinan liubá, hafoin diminuisaun anual sira hosi 4% resin tinan-tinan iha 2016 ho 2017.

Kona-ba PIB ne'ebé la'ós petrolíferu, ekonomia aumenta 5,3% iha 2016, maibé hafoin ne'e hetan diminuisaun maka'as hosi 4,6% iha 2017, hodi iha paralizasaun kuaze tomak iha tinan liubá.

Fator ida ne'ebé maka kondisiona ambiente maka atrazu iha pagamentu ba tusan sira Estadu nian ba fornesedor sira no empreza sira ne'ebé envolve iha projetu sira.

Fidelis Magalhães garanti ona katak "Estadu sei seluk" maibé presiza "iha prosesu sira hodi verifika buat hotu" hodi evita pagamentu sira ne'ebé la loos.

"Ema barak hatete katak iha kontratu ho Governu maibé sira laiha. Bainhira ita ko'alia hadi'a sistema, kombate korupsaun, ita tenki tau sistema iha nia fatin", nia afirma.

"Iha mudansa sira no reintrodusaun hosi sistema iha ema balun ne'ebé la gosta, la senti konfortável ho mudansa sira ne'e. Maibé ha'u bele garanti katak mudansa sira hanesan ba dalan di'ak. Governu iha konsiénsia katak sei selu. Maibé tenki iha verifikasaun antes selu. La'ós selu tanba tenki selu", nia afirma.

Ministru rekoñese dezafiu sira ne'ebé ekonomia nasional sei hasoru, ho situasaun sira hanesan konsekuénsia "hosi demokrasia rasik", ho "situasaun pekuliar ida" ne'ebé akontese tanba Timor-Leste sei hanesan Estadu ida joven no iha dezenvolvimentu.

"Tuir polítika, ami hanesan nasaun ida avansa tebes maibé tuir ekonomia ami iha situasaun fraku ida, presiza lalais harii no iha investimentu loloos sira hodi proporsiona dezenvolvimentu. Hanesan iha nafatin velosidade rua: polítika ho ekonómiku", nia hatete.

Fator ida ne'ebé maka afeta hela nasaun maka diverjénsia, lahó solusaun, iha nomeasaun hosi membru na'in sia hosi ezekutivu, ne'ebé primeiru-ministru la muda nia naran maibé Prezidente Repúblika lakohi fó pose.

"Hanesan ideal iha membru tomak, maibé ami iha membru sira ne'ebé iha daudaun no ami hein hela desizaun hosi señór Prezidente. Señór Prezidente mantén desizaun no señór primeiru-ministru mantén nia proposta", nia hatete.

Lusa | SAPO TL