DILI, 08 maiu 2019(TATOLI) - Diretór
Nasionál Terra, Propriedade no Servisu Kadastru, Ministériu Justisa,
Hóracio da Silva esplika, seidauk iha lei maka define atu sidadaun ne’ebé
okupa uma estadu atu sai na’in maske durante ne’e selu ona arrendamentu ba
kofre estadu kada fulan.
Lei númeru 1/2003 no
dekretu Lei nú19/2004 la define kona-ba atu sai na’in ba propriedade
estadu, maibé regula de’it atu uza hodi hela no halo atividade negósiu hodi
selu arrendamentu ba estadu kada fulan no na’in ba propriedade públiku hirak
ne’e maka estadu.
“Lei seidauk ko’alia tanba
ne’e ita selu arrendamentu ne’e to’o bainhira maka estadu atu fó títulu
ba ita. Ita labele tau iha hanoin katak ha’u selu entaun ba futuru
ha’u nian, tanba iha lei ne’e dehan sidadaun bele hela maibé seidauk fó diretu
atu sai na’in”, esplika Hóracio da Silva ba Ajénsia TATOLI, ohin, iha Bebora,
Dili.
Sidadaun 4.800 resin maka oras
ne’e rejista ona iha diresaun terras propriedade tanba okupa uma estadu no rai
estadu hodi selu arrendamentu ba kofre estadu.
Lei titular no rendimentu movies
iha ona númeru 13/2017 no vigora iha 5 Jullu maibé seidauk iha definisaun
loloos atu fó titularidade ba timoroan atu sai na’in ba rai no propriedade
estadu nian tanba ne’e iha tinan ida ne’e sei prepara tan dekretu lei hamutuk
21 hodi haruka ba governu atu nune’e hodi fó definisaun ba titularidade na’in
ba rai.
Kona-ba arrendamentu ba uma
estadu no rai estadu bazeia ba lokalizasaun no tipu utilizasaun bainhira okupa
uma estadu hodi hela kada fulan selu ba estadu hosi valor US$10 to’o
US$20-resin. Maibé, uza hodi halo atividade negósiu no lokalizasaun rai iha
área prioridade (Zona Ida)kobre área tasi ibun, Colmera, Lecidere, Fatuhada,
Comoro, Kampung Baru, hodi halo negósiu sidadaun timoroan tenke selu US$1.00
kada metru Kúbiku (m2) no sidadaun estranjeiru tenke selu US$1.80 kada metru
kúbiku.
Iha Zona II kobre Bairru-Pite no
fatin sira la potensiál atu halo negósiu inklui zona III iha area Manleu,
Fatumeta no Balide rai hun valor arrendamentu menus hosi US$1.00.
Iha kontratu arrendamentu tuir
lei no dekretu lei ne’e la hakerek atu okupante halo reabilitasaun ka
kontrasaun foun ba uma estadu maibé depende ba responsabilidade sidadaun
atu hadi’a hodi hela ho kondisaun ida dignu tanba governu sei la halo
rekompensasaun bainhira estadu presiza atu uza fatin refere.
“Ita maka iha hanoin, vontade atu
hadi’a bainhira kalén ko’ak, ka odamatan ida aat tanba estadu la dehan
ita atu hadi’a no bainhira estadu presiza atu uza husu ita sai labele husu fali
selu kompensasaun hosi estadu”, nia esplika.
Lei ne’e mós fó obrigasaun ba
sidadaun atu selu arrendamentu, kuidadu sasán estadu no labele fa’an tutan ba
benefisiáriu segundu.
“Ami seidauk simu kazu ema fa’an
uma estadu, maibé sira halo transferénsia ba ema seluk iha bainhira hakarak
muda hela fatin ba munisipiu”, Hóracio da Silva hateten.
Jornalista: Agapito
dos Santos | Editór: Francisco Simões
Imajen: Diretór Nacional de
Terras Propriedades Serviços Cadastrais (DNTPSC).Hóracio da Silva, Imajen/Egas
Cristovão
Sem comentários:
Enviar um comentário