Promesa Polítika “Hasai Povu Hosi Mukit” Tenki Sai Realidade

LOSPALOS, 18 maiu 2019 (TATOLI) - Populasaun hosi Suku Loré I no Suku Loré II, Postu Administrativu Lospalos, Munisípiu Lautém, husu ba líder polítiku sira atu ba iha prátika promesa polítika “hasai povu sai hosi mukit” hodi hetan moris di’ak ho dignu.

Suku Loré II ho aldeia tolu, Ililapa, Hatukupa no Nuhalapa ho totál familia uma kain 1.357 durante tinan 20 liu ona sente moris izoladu tebes hosi dezenvolvimentu infraestrutura hanesan povu sei moris iha mukit, estrada aat, susar asesu  edukasaun, saúde no la asesu ba informasaun hosi mídia kona-ba prosesu dezenvolvimentu  iha Timor-Leste.

“Ami povu presiza liu mak promesa nai polítiku iha governu atu lori povu ba moris di’ak, asesu ba dezenvolvimentu no moris di’ak tenki sai realidade.  Labele mai ko’alia de’it, maibé realidade laiha,” dehan Administrador Postu Administrativu Lospalos, Tadeu da Costa, bainhira hala’o enkontru ho Sekretáriu Estadu Komunikasaun Sosiál (SEKOMS), Merício Juvinal “Akara” iha sede Suku Loré II, sábadu (18/05).

Nia dehan, povu hotu nia hanoin sei fresku hodi lembra promesa líder polítiku liuhusi sosializasaun Planu Estratéjiku Dezenvolvimentu Nasionál (PEDN) 2011-2030 iha tinan 2009 katak liberta povu moris hosi nakukun hodi dada eletrisidade tama suku realiza ona, maibé iha Loré povu sei kontinua preokupa mak estrada aat difikulta povu no transporte públiku atu lori produtu ba fa’an iha merkadu.

Problema seluk tan, Tadeu haktuir, mak povu susar atu asesu informasaun liuhusi kanál mídia imprime no televizaun, tanba atu haree no akompaña notísia Televizaun Timor-Leste (TVTL) só populasaun ne’ebé iha parabola mak bele asesu.

“Ami husu no hakarak liu maka povu tenki asesu ba informasaun hosi televizaun hodi povu bele akompaña informasaun no mídia sira mós bele mai rekolla povu nia preokupasaun hato’o ba Estadu,” nia hatete.

Iha fatin hanesan, Xefe Suku Loré II, Armando de Jesus hato’o agradese tanba durante Timor-Leste ukun aan, foin primeiravez mak Sekretáriu Estadu Komunikasaun Sosiál, Maricio Akara vizita ba sira nia suku hodi halo enkontru sosializa programa VIII Governu ba povu no nia povu nia preokupasaun.

“Durante ita ukun aan, foin primeiravez membru governu ida mai vizita ami nia suku no ko’alia ho ami kona-ba programa governu no rona mós povu nia problema sira hodi hato’o ba líder sira,” nia dehan.

Armando husu atu governu rezolve uluk mak problema estrada aat, nune’e povu no estudante sira ba eskola bele la’o lori tempu besik ho transporte no problema seluk ne’ebé povu hasoru mak sei hela iha kondisaun uma ne’ebé la dignu, tanba laiha kbiit atu halo uma ho kalén.

“Ami nia povu balun sei moris terus no ki’ak liu laiha kbiit atu halo sira nia uma, no balun to’o agora sei hela iha uma duut. Dalaruma povu sira hirus ami tanba suku ne’e izoladu tebes hosi dezenvolvimentu,” nia preokupupa.

Responde ba preokupasaun ne’e, Sekretáriu Estadu Komunikasaun Sosiál (SEKOMS), Merício Juvinal “Akara”, tenik agora dadaun VIII Governu hahú hadi’a neneik ona estrada no ponte hosi Dili, Baucau, Lospalos no sei to’o mós ba suku sira iha Timor laran tomak inklui Suku Loré I no Loré II.

“Problema estrada aat ne’e, ita nia Ministériu Obra Públika (MOP) kria hotu ona planu dezenvolvimentu atu hadi’a estrada hotu inklui estrada Loré ne’ebé ami liu haree aat hotu ona sei hadi’a,” Akara haklaken.

Nia promote katak iha tempu ruma sei lori Ministériu Obra Públika (MOP) atu haree estrada aat iha Lautém tomak hodi bele hato’o ba governu tau iha polítika para bele hadi’a.

Aleinde estrada, nia hatutan, governu sei kontinua hadi’a programa bee-moos ba povu, fasilidade, kualidade edukasaun no infraestrura, saúde no seluk-tan.

Iha enkontru ho povu, Akara introdúz mós “Programa Naroman Ba Suku” mai ho ninia misaun koopera ho mídia desentraliza informasaun, katak tenke lori informasaun to’o aldeia no suku hotu atu povu asesu no akompaña dinámika polítika, ekonomia no dezenvolvimentu TL.

Vizita Sekretáriu Estadu ho nia espoza no ekipa ba suku simu hosi populasaun no lia na’in sira ho dansa tradisionál tuir kultura Lautém hodi hamulak husu matak no malirin ba timoroan tomak atu moris iha dame.

Jornalista: Eugénio Pereira | Editór: Xisto Freitas

Imajen: 1) Administradór Postu Administrativu Lospalos, Tadeu da Costa, hato’o nia deskursu iha sede Suku Loré II, sábadu (18/05). Imajen Tatoli/Eugénio Pereira; 2) Sekretáriu Estadu Komunikasaun Sosiál (SEKOMS), Merício Juvinal “Akara”, hala’o enkontru ho populasaun iha sede Suku Loré II, Postu Administrativu Lospalos, Luatém, sábadu (18/05). Imajen Tatoli/Eugénio Pereira