Sidadaun 25 Sei Simu Kondekorasaun Hosi Prezidente Repúblika

DILI, 18 maiu 2019 (TATOLI) – Sidadaun nasionál 25 sei simu kondekorasaun hosi Prezidente Repúblika (PR), Francisco Guterres Lú Olo, iha ámbitu selebrasaun tinan 17 loron restaurasaun independénsia.

Xefe Estadu sei atribui orden Timor-Leste nu’udar forma rekoñesimentu no valorizasaun husi Estadu ba sira-nia kontribuisaun iha funu durante okupasaun Indonézia, eskluzivamente halo funu iha Frente Armada durante tinan-24.

Tuir nota komunikadu ne’ebé TATOLI, I.P simu hosi mídia PR ohin haktuir, kondekorasaun ne’e bazeia ba dekretu Prezidente Repúblika númeru 18/2019, hodi rekoñese no valoriza  sidadaun nasionál ne’ebé dedika án no sara án tomak liberta pátria husi okupasaun estranjeira.

Sidadaun sira ne’ebé hetan kondekorasaun  “Kolar Orden Timor-Leste” mak kolaboradór Xefe Estadu Maiór José Agostinho Sequeira ‘Somotxo Matar Mimiraka’,  Primeiru Komandante Rejiaun no Sekretáriu Rejiaun II Américo Ximenes ‘Sabika Besi Kulit’.

Prezidente Repúblika fó kondekorasaun “Kolar Orden Timor-Leste”, a títulu póstume ba Xefe Estadu Maiór Reinaldo Freitas Belo ‘Kilik Wai Gae’, Kolaboradór Xefe Estadu Maiór Afonso Henrique Monteiro ‘Kaluwai’.

Komandante Rejiaun Haksolok Venancio ramos Amaral Ferraz,  Primeiru Komandante Rejiaun IV Virgilio dos Anjos ‘Ular Rihik’,  Adjuntu Polítiku Militár Rejiaun III Felisberto Maria dos Santos ‘Solep Solep’, Adjunta Políku tiku Militár Rejiaun III Etelvina Fernandes Belo ‘Bi-doli-mau’, Komisáriu Polítiku José Maria do Rosário Albano da Costa, Adjuntu Polítiku Militár Rejiaun III Diogo Bonaparte Soares ‘Lorsan’.

Sidadaun ne’ebé hetan kondekorasaun “Medalla Orden Timor-Leste” ba Segundu Komandante Manuel Freitas ‘Lenicai’, Komandante Pelotaun Fernando Bere-Du’u Gusmão,  Komandante Orlando Jerónimo da Costa ‘Serasa’, Komandante Seksaun João Cabral ‘Mau Wairia’, Soldadu António da Costa ‘Derak’,  Soldadu Lourenço da Silva Freitas ‘Parli’, Soldadu Armando Viegas ‘Atchatei’.

Xefe Estadu mós sei kondekora “Medalla Orden Timor-Leste”, a títulu póstume ba Primeiru Komandante Sextu Kompañia Rejiaun Haksolok Januário Xavier ‘Lekas’,  Primeiru Komandante Kintu Kompañia Rejiaun Nakroman Filomeno da Silva ‘Mer Sabala’,  Primeiru Komandante Destakamentu Norte/Rejiaun Haksolok Henrique de Oliveira ‘Sama Lae’, Komandante Kompañia Roberto das Neves ‘Txaibada’, Asistente Polítiku Militár Rejiaun Haksolok Regina Xavier ‘Mahon’, Komandante Seksaun Cesário Ximenes ‘Liter’, Soldadu Domingos Pinto ‘Funu Kiak’ no Soldadu Agostinho Sarmento ‘Mautino’.

Orden Timor estabelese ho dekretu lei númeru 20/2009 atu rekoñese sidadaun estranjeiru no nasionál ne’ebé fó sira-nia kontribuisaun ba Timor-Leste liuhusi asaun ne’ebé lori mudansa ba Timor-Leste no umanidade.

Edisaun: Rita Almeida

Imajen: Prezidente Repúblika, Francisco Guterres Lú Olo, bainhira kondekora funu na’in FALINTIL iha loron proklamasaun independénsia. Imajen dokumentasaun mídia PR