LOIDAHAR, 20 maiu 2019 (TATOLI) -
Komunidade hosi Postu Administrativu Liquiçá Vila, Munisípiu Liquiçá,
kompostu hosi suku 7 selebra loron Restaurasaun Independénsia Timor-Leste
ba dala 17 iha sede Suku Loidahar, segunda ne’e.
Suku 7 refere mak hanesan Dato,
Loidahar, Darulete, Lukulai, Assumano, Hatuquessi no Leotala.
Xefe Suku Loidahar hanesan
uma-na’in ba tinan ida ne’e, Domingos dos Santos, sente orgullu ho selebarasaun
ba tinan ida ne’e tanba bele realiza iha nia suku.
“Hanesan xefe suku sente
orgullu no onra boot ida tanba loron Restaurasaun Independénsia ba dala-17 bele
realiza iha ami-nia suku. Ne’e primeiravez postu 7 iha Liquiçá nian selebra
loron boot iha suku. Ne’e para komunidade mós bele hatene istória kona-ba loron
nasionál no rona direta mensajen Xefe Estadu nian,” Domingos ba Agência TATOLI
iha sede Suku Loidahar, ohin.
Nia husu katak ba oin selebrasaun
nasionál sira tenke kontinua desentraliza iha suku sira liuhusi dalan rotasaun
hosi suku ida ba suku seluk iha kada tinan.
Iha fatin hanesan, Xefe Suku
Assumano, Bernardino Martins, subliña loron ne’e importante tebes, entaun povu
presiza rona mensajen nasaun nian.
“Selebrasaun ne’e presiza
kontinua hosi suku ida ba suku seluk, nune’e bele anima komunidade. Dala barak
selebra de’it iha kapitál munisípiu, maibé Liquiçá nian hahú selebra iha suku,”
dehan xefe suku ne’e.
Tuir observasaun, komunidade hosi
suku 7 partisipa iha komemorasaun ne’e ho entusiazmu tebes. Entretantu,
selebrasaun nível munisipál nian hala’o iha Suku Vatuboro, Postu Administrativu
Maubara, Munisípiu Liquiçá, ne’ebé inspetur serimómia dirije hosi Vise
Ministru Saúde, Bonifâcio Maukoli. Maibé, nível Postu Administrativu Bazartete
nian selebra iha Suku Fahilebo.
Jornalista: Evaristo Soares
Martins | Editór: Xisto Freitas
Imajen: Imajen hasa’e bandeira
nasionál nu’udar símbolu komemora loron Restaurasaun Independénsia RDTL. Foto
espesiál
Sem comentários:
Enviar um comentário