SEFOPE Espera Polítika Ba Mudansa Saláriu Mínimu Aprova iha Juñu

DILI, 21 maiu 2019 (TATOLI) - Sekretáriu Estadu Formasaun Profisionál no Empregu (SEFOPE), Julião da Silva, espera katak, iha fulan juñu nia laran, bele aprova ona polítika ba mudansa saláriu mínimu.

Sekretáriu Estadu Julião da Silva, ohin, iha salaun Ministériu Finansa, informa, polítika ba mudansa saláriu mínimu atinje ona porsentu 90 no hein de’it atu lori bá Konsellu Ministru.

Iha loron traballadór nian ne’ebé monu iha 1 maiu, foin lalais ne’e, Sekretáriu Estadu Julião da Silva, informa, ekipa traballu sei finaliza servisu no aprezenta polítika ne’e ba Konsellu Ministru iha tempu badak hodi hetan aprovasaun.

Enkuantu husu sobre montante ba saláriu mínimu ne’e Sekretáriu Estadu seidauk bele fó sai no bainhira hetan ona aprovasaun mak ema hotu bele hatene.

Iha momentu hanesan Sekretáriu Jerál Konfederasaun Sindikatu Timor-Leste, José da Conceição da Costa, informa iha fulan kotuk konklui ona rekomendasaun kona-ba revizaun ba saláriu mínimu no SEFOPE komprometidu atu lori bá Konsellu Ministru iha maiu no juñu nia laran.

Notísia relevante : http://www.tatoli.tl/2019/04/ekipa-sefope-sei-aprezenta-politika-ba-mudansa-salariu-minimu/

http://www.tatoli.tl/2019/05/governu-hahu-estuda-hadia-politika-implementasaun-salariu-minimu/

Jornalista: Maria Auxiliadora | Editór: Francisco Simões

Imajen: Sekretáriu Estadu Formasaun Profesionál no Empregu (SEFOPE), Julião da Silva. Imajen/Egas Cristovão