domingo, 2 de junho de 2019

Governu promete apoiu ba komersiante vítima sira hosi inséndiu iha merkadu


Governu garanti, iha loron-kinta ne'e, katak sei apoia komersiante sira hosi merkadu iha vila Manatuto, ne'ebé maka hetan estraga iha inséndiu iha loron-segunda ne'e, hodi esplika katak hala'o ona limpeza no avaliasaun hosi estraga sira ne'e. 

"Governu, liuhosi Sekretaria Estadu ba Protesaun Sivil ho Servisu Munisipal hosi Asaun Sosial no Jestaun ba Dezastre Natural sira hosi Ministériu Solidariedade Sosial hosi Munisípiu Manatuto nian, serbisu daudaun hodi rekolla informasaun sira hodi hametin apoiu ba populasaun ne'ebé afetadu no garanti atu ema sira bele kontinua lalais ho nia atividade komersial", refere hosi Governu iha komunikadu.

Inséndiu, ne'ebé karik akontese tanba problema elétriku ida, estraga ona merkadu vila Manatuto nian, iha kilómetru 68 resin hosi leste kapital Díli.

"Felismente laiha rejistu ba vítima", hatete hosi komandante bombeiru timoroan nian, Cláudio Silva, ba Lusa. "Mutuk total. Ema sira lakon sasán barak. Iha de'it destruisaun ba propriedade sira", nia refere.

Governu, hatudu solidariedade ho populasaun ne'ebé afetadu, esplika katak "susar sira asesu ba fatin ho ba bee, tanba produtu sira ho material sira ne'ebé hanesan fásil tebes hodi ahi sunu, halo susar asaun sira hosi bombeiru sira no nune'e maka ahi han lalais tebes".

"PNTL ho Bombeiru sira hala'o hela investigasaun iha fatin akontesimentu hodi deskobre kauza sira hosi inséndiu no hala'o daudaun limpeza iha área afetadu hosi inséndiu", hatete hosi ezekutivu.

Cláudio Silva hatutan katak informasaun dahuluk sira hatudu katak inséndiu akontese tanba kurtu-sirkuitu elétriku ida.

Inséndiu hahú iha tuku 20:00 (oras lokal) loron-tersa no alastra lalais ba kuaze estrutura tomak merkadu nian, harii ho ai ho kalen, laiha meiu ne'ebé adekuadu hodi kombate inséndiu iha lokal.

Lusa | SAPO TL

Sem comentários: