Jenerál Lere nia intervensaun halo RNDJK adia “manifestasaun”

DILI, 02 setembru 2020 (TATOLI) -- Grupu Rezisténsia Nasionál Defende Justisa no Konstituisaun RDTL (RNDJK) hato’o hikas pedidu ba Komandu Polísia Nasional TimorLeste (PNTL) hodi adia asaun pasífiku ka “manifestasaun” ba loron seluk.

Portavós RNDJK, Angela Freitas, hamutuk ho nia maluk sira, ohin, ba hasoru diretamente PNTL iha Kuartél Jerál, Caicoli, Dili, hodi informa adiamentu “manifestasaun” popular kontra Prezidente Repúblika (PR), Francisco Guterres “Lú Olo”, tanba hetan presaun maka’as husi FALINTIL-Forsa Defeza Timor-Leste (F-FDTL) ne’ebé RNDJK konsidera simu orientasaun husi Xefe Estadu Maiór F-FDTL, Majór Jenerál Lere Anan Timur.

Tuir loloos grupu RNDJK mobiliza povu husi munisípiu 12, inklui povu Rejiaun Administrativu Espesiál Oe-Cusse Ambeno (RAEOA) atu konsentra halo manifestasaun kontra Francisco Guterres “Lú Olo” iha loron 04 to’o loron 18 setembru, tinan ne’e, maibé RNDJK adia hikas ba loron selu tanba presaun direita husi F-FDTL.

Angela Freitas deklara, razaun fundamentu RNDJK adia asaun ne’e, tanba iha loron 1 setembru 2020, tuku 14:00 Otl, hetan presaun husi membru F-FDTL hodi halo buska “ilegal” ba nia rezidénsia no fó presaun ba ekipa komisaun organizadora ne’ebé halo preparasaun harii tenda iha Kampu Tasi-Tolu, Dili.

“Hatudu katak, ita nia rain atu aplika ditadura militár, tanba ne’e duni, RNDJK haree no tetu katak, loron ne’ebé ami determina atu halo asaun iha 4 too 18 setembru 2020, ami sei muda fila fali, tanba ho akontesimentu horiseik halo pániku ida ba ita nia povu, tanba ami nia masa iha munisípiu 12 no RAEOA atu tun,” hateten Angela Freitas, liuhusi konferénsia imprensa iha Bairru Grillos, Dili.

Angela konsidera Komandante F-FDTL Lere Anan Timor nia desizaun hodi hatún espesiál F-FDTL ho kilat taka oin metin serku nia rezidénsia nu’udar asaun kontra lei no kontra regra demokrasia.

“Jenerál Lere Anan Timor labele hasai deklarasaun ida ho liafuan ‘kesi’ no ‘sama belar’ ida ne’e provoka situasaun, tanba ema iha rai li’ur akompaña ita nia situasaun,” Angela Freitas hateten.

Angela konsidera situasaun ne’ebé akontese ba nia nu’udar sidadaun hanesan ameasa kontra direitu umanu ne’ebé Organizasaun Nasoins Unidas (ONU) rasik observa hela prosesu demokratizasaun ne’ebé la’o iha Timor-Leste. Tanba asaun FFDTL ne’e viola K-RDTL artigu 146 kona-ba kompeténsia forsa armada nian no viola artigu 147 kona-ba kompeténsia PNTL nian.

“Ami sei komunika diretamente organizasaun internasionál atu akompaña ita situasaun ida ne’e,” Angela tenik.

Asaun F-FDTL ne’e laiha baze legál tanba Tribunál de’it maka iha autoridade atu hasai mandadu kapturasaun ba sidadaun ruma bainhira kontra lei.

Nia hatutan, grupu movimentu defende KRDTL espresa sira nia liberdade tuir KRDTL artigu 42 kona-ba liberdade reuniaun no manifestasaun nian. Tanba ne’e asaun FFDTL nian ne’e mós viola KRDTL artigu 42.

Nia hatutan, PNTL fó ona autorizasaun tuir lei atu halo manifestasaun husi loron 4 to’o 18 Setembru iha Tasi-Tolu. Tanba ne’e, Angela lamenta tebes F-FDTL nia asaun hodi halo buska ba nia rezidénsia no fó presaun ba membru RNDJK ne’ebé halo preparasaun iha terrenu.

Angela hatutan, militár halo emboskada ba nia uma hakat liu fali servisu PNTL nian. Tanba tuir loloos labele akontese iha nasaun demokrasia hanesan agora.

Nia hatutan, objetivu prinsipál asaun ne’ebé sira halo hodi hato’o karta petisaun ba PR Lú Olo hadi’a no solusiona krize polítika ne’e.

Jornalista: Eugénio Pereira | Editór: Francisco Simões

Notísia Relevante:

Jenerál Lere sei lori forsa kaptura Angela Freitas ho António Aitahan Matak.