Lúcia: “Xanana Ida De'it no Merese Respeitu ho Domin husi Ema Hotu”

Timor Post (25/09/2020) -- Eis Ministra Justisa iha governu dahaat, Lúcia Lobato ho nia kaben partisipa iha surumutu Líder Nasionál Kayrala Xanana Gusmão ho misaun hanaran Misaun COVID iha Suku Klakuk, Postu Administrativu Fatuberlihu, Munisípiu.

Sorumutu ida ne'e amigavel tebes. Lúcia hakbesik-an ba komprimenta Xanana ho respeitu no domin boot tebes.

Lúcia dehan, iha Timor Leste, Xanana ida de'it no merese respeitu ho domin husi ema hotu.

“Timor Leste iha Xanana ida de'it. Hanesan ser umanu bele ho defeitos balun maibé kontinua nafatin Xanana ida ne'ebé merese respeitu ho domin husi ema hotu. Bem-vindo MBXG mai ami nia suku ”Lúcia fó ben-vindu ba Xanana.

Molok Xanana ko'alia kona-ba misaun ne'ebé nia inisia hanaran Misaun COVID, iha Suku Klakuk, Xanana hasé liu Lúcia Lobato ho nia kaben.

Xanana dehan, kleur la hasoru. “Uluk iha Dili, ha'u husu ba ne'ebé, ema dehan ne'e ita buka la hetan. Afinal iha ne'e hela ”, Xanana ko'alia ho jestu kómiku no Lúcia ho nia kaben hamnasa.

Iha okajiaun fahe nesesidade báziku ba povu kbiit laek sira iha Suku Klakuk, Xanana konvida mós Lúcia hodi entrega sasan ba Avo Ferik ida.

“Ha'u lori Horta nia naran, konvida feto foun (Fatuberlihu) mai entrega hela ba Ama,” Xanana fó tempu no Lúcia hakat ba entrega sasan.

Lúcia durante ne'e ho nia kaben ba mai Dili-Fatuberlihu no halo natar não to'os hamutuk ho komunidade sira iha Fatuberlihu i konsege lori ona ba fa'an iha merkadu rai laran liuliu iha Dili. (cao)

Lee mós iha Timor Post:

Tama Ilegál, MI sei Prosesa Sidadaun Na'in-300 ba MP

Akontesimentu Taa iha Laklo: Oan Mate Fatin, Aman Evakua ona ba HNGV