Vise Ministru Interiór lamenta membru Polísia fasilita oan ba sa'e sabuk iha Atambua

DILI, 29 setembru 2020 (TATOLI) - Vise Ministru Interiór, António Armindo, lamenta bainhira rona informasaun iha membru polísia balun fasilita sira-nia oan no family hosi tama sai ilegál fronteira terrestre Timor-Leste no Indonézia hodi ba sa'e sabuk iha Atambua , Indonézia.

Membru Governu ne'e konsidera hahalok membru polísia ne'e kontra regra Estadu Emerjénsia (EE) ne'ebé implementa iha Timor-Leste. Tanba ne'e, nia husu ba Komandu Jerál PNTL atu haree kazu ne'e ho sériu. Tanba, membru polísia ida fasilita nia oan no family halo viajen ilegál iha fronteira rua, ne'e grave tebes.

“Problema maka ne'e, se (polisia ida) fasilita membru família ida tama sai ilegál iha nasaun soberania. Ida ne'e maka problema boot ba ita. Nusa maka membru polísia ne'e la servisu hamutuk ho Governu para mantein lei orden no estabilidade seguransa ”, hateten Vise António Armindo, ba jornalista, ohin, iha Kuartél Jerál PNTL, Caicoli, Dili.

Nia husu ba Komandu Jerál PNTL atu haree kazu membru arte marsiál Persaudaraan Setia Hati Terate (PSHT) na’in-300-resin ne’ebé PNTL detein no hela provizóriu iha kuarentena remata tiha tenke investiga no aprezenta kazu ne’e ba Ministériu Públiku.

Nia konsidera, ema sira-ne’e presiza investiga no prosesa sira-nia kazu ba Ministériu Públiku, tanba la koopera ho autoridade seguransa no fó ameasa ba seguransa nasionál.

Iha fatin hanesan, Komandante Jerál PNTL, Komisáriu Faustino da Costa, dehan, prosesu investigasaun ba membru polísia sira ne’ebé fasilita sira-nia oan no família ba sa’e sabuk iha Atambua seidauk remata.

Nia dehan, bainhira prosesu investigasaun halo remata tiha, sei aprezenta ba Ministériu Interiór hodi foti desizaun.

Membru PSHT sira ne’ebé PNTL detein no bainhira remata kumpre ona kuarentena liu loron 14, PNTL sei ba foti hodi lori fali ba Komandu PNTL Bobonaro, hodi halo prosesu investigasaun no aprezenta ba Ministériu Públiku.

Jornalista: Eugénio Pereira | Editór: Francisco Simões

Notísia Relevante: Ema balun fasilita membru PSHT sa'e sabuk iha Indonézia