Falsifika Dokumentu Hasoru Lei

DILI, STLNEWS.co – Veteranu neebe envolve iha falsifikasaun dokumentu hodi hetan lukru ba sira nia aan rasik, sei hasoru lei.

Xefe Estadu Maior Falimtil-Forsa Defeza Timor Leste (F-FDTL) Maijor Jeneral Lere Anan Timur hatoo kestaun nee bainhira remata hasoru malu ho Prezidente Republika iha Palasiu Prezidente Bairru Pite, Kuarta (21/10/2020).

Major Jeneral Lere dehan Timor Leste iha ona lei, tanba nee vetaranu neebe envolve iha falsifikasaun dokumentu, sei hasoru lei hanesan foin daudauk kaer ona ema nain sia, hetan ona kadeia. “Hau lalika koalia kona-ba ida nee, tanba lei iha ona, se maka falsifika, lei iha atu nia hasoru lei nee, hanesan foin daudauk nee dehan kaer ona veteranu nain sira e ba kadeia tinan lima lei maka sei deside,” dehan Maijór Jenerál Lere.

Nunee mos Prokurador Jeral Republika Jose da Costa Ximenes iha Segunda nee foin lalais nee informa konaba preokupasaun Prezidente republika nian relasiona ho kazu envolvimentu veteranu balu iha falsifikasaun dokumentus.

“Prezidente Republika preokupa tebe-tebes liu-liu ho krime organizada sira hanesan kontra bandu, maibe liu-liu ba falsifikasaun dokumentus neebe akontese iha Komisaun Omenajen no membru veteranu balun neebe envolve,” katak PJR nee.

Nia hatutan kazu falsifikasaun neebe veteranu balun komete katak veteranu balun sai broker buka ema sira nia naran neebe komisaun omenajen suspende hela, buka ema, rekruta ema atu tau ema oin iha laran, falsifika ema nia oin depois simu osan. Veteranu ida nee naran Joaquim, nia laos envolve kazu primeiru, nee kazu barak ona.

“Hau hakarak fo hatene ba ita boot sira no komunidade hotu katak veteranus nee naran sagradu, neebe ema hotu tenke respeita, agora ida veteranus nee maka buka fali, falsifika fali dokumentu hanesan nee, hau la hatene nia nee bolu loloos nee bolu saida loos, agora iha prizaun hela, balun iha Komisaun Omenajen,” hatete nia.*

Suara Timor Lorosae | Reportajen: Emerenciana Pinto | Editor: Ekipa STL

Imajen: Xefe Estadu Maior Jeneral F-FDTL, Major Jeneral Lere Anan Timur. (Foto: STL/Emerenciana Pinto)