DILI, STLNEWS.co – Durante halao prosesu aprendizajen liu husi sistema online ka internet, husi parte manorin nain sira lagarante kualidade edukasaun iha Timor Leste.
Akademista Universidade Nasional de Timor Lorosae (UNTL), Camilo Ximenes Almeida hatete, ensinu distansia nee apenas atu priense deit rekezitus, hodi bele ajuda estudante sira, tanba dala barak estudante sira kumpri ona nia dever, maibe nia lahetan nia diretu.
Pur ezemplu mak eskola ensinu baziku too universidade selu propinas fulan-fulan, maibe iha EE no SS konfinamentu obrigatoriu, ho nunee iha esijensias inan aman sira nian, entaun Ministeriu relevante taka frakeza sira nee mak obriga professores no estudante halo ensinu distansia.
“Ita nia infraestrutura hanesan rede internet neebe lao hanesan lenuk liu kuaze halo lakon osan deit no investe makaas fali emprezariu Timor Telecom, Telkomcel no Telemor, nunee ita atu dehan kualidade nee karik tuir Amo Bispo Baucau dehan ita bosok kompletu. Tanba nee mak ita lagarante kualidade edukasaun iha rai laran,” dehan Camilo ba STL, liu husi telefone, Kuarta (05/05/2021). Nia observa durante estuda liu husi sistema online ka rede internet hein too gagal.
Iha parte seluk estudante UNTL, Luiza Noviana Suni hatete, “durante ami aula online buat barak mak ami hasoru, tanba tuir hau nia hanoin aula online diak, maibe iha parte balun ladiak, tanba wainhira aula online ita presiza enxe pulsa mak bele halao aula, neebe dala ruma ita kompriende no lakompriende,” nia dehan.
Nia akresenta, iha parte diak tanba ita hakmatek iha uma, maibe parte ladiak nee, dala ruma dosente fo deit topiku mai ita no laesplika tan, depois ita aprezenta tugas husi whatsapp, nee susar atu kompriende.
Reportajen: Blandina Mauno | Editor: Ekipa STL
Sem comentários:
Enviar um comentário