terça-feira, 11 de maio de 2021

Covid-19 Sae Makas, AUSMAT Rekomenda Governu Hasae...

Kapasidade Fasilidade Saude

DILI, STLNEWS.co – Australian Medical Assistance Teams (AUSMAT), rekomenda ba governu Timor Leste atu hasae kapasidade fasilidade saude nia, hanesan hadia asesu ema nia ba iha oxigeniu, nunee wainhira numeru infesaun Covid-19 kontinua aumenta pasiente sira bele uza.

Tuir Ministru Prezidensia Konsellu Ministru (MPKM) Fidelis Manuel Leite Magalhães katak, iha reuniaun komisaun interministerial kolia kona ba medida prevensaun ba surtu Covid-19 neebe mak aprezenta husi ekipa AUSMAT Australia, neebe hakarak fo sira nia apoiu para luta hasoru Covid-19.

“Primeiru rekomendasaun husi Australian Medical Assistance Teams (AUSMAT) ba governu Timor Leste mak ita tenke hadia ita nia fasilidade saude, hanesan asesu ema nia ba oxigeniu tanba haree tuir modelu infesaun Covid-19 neebe mak iha, ita la preve numeru atu tun no semana hirak mai sei bele sae makas liu tan,” dehan Ministru Fidelis iha salaun auditorium Ministeriu Finansas, Aitarak-Laran, Segunda (10/05/2021).

Fidelis dehan, informasaun neebe tekniku husi MS aprezenta katak numeru infesaun iha Timor Leste, liu liu kapital Dili kontinua sae makas bele kompara ho India ho Brazil tuir persentajen numeru populasaun neebe iha.

“Tanba nee mak sira apela atu ita hotu tenke halo esforsu hotu para moras nee labele daet hotu populasaun sira iha kapital Dili nee,” teknik nia

Fidelis hatutan, ekipa AUSMAT konsidera dezisaun neebe governu hasai hodi implementa serka sanitaria iha munisipiu Dili hanesan pasu ida neebe pozitivu tebes nunee bele prevene moras Covid-19 labele daet to munisipiu hotu iha Timor Leste.

“Serka sanitaria neebe implementa iha munisipiu Dili nee parte ida neebe mais importante tebes, tanba bele prevene moras nee labele daet to munisipiu sira seluk para bele reduz lalais numeru infesaun nee iha teritoriu laran,” dehan nia

Tanba nee Ministru Prezidensia Konsellu Ministru hateten, rekomendasaun no aprezentasaun husi Australian Medical Assistance Teams (AUSMAT), governu sei tetu liu husi reuniaun Konsellu Ministru neebe sei halo enkontru iha Kuarta (12/05/2021), para bele deskute hasai dezisaun ba iha rekomendasaun hirak nee.

Reportajen: Ekipa STL

Imajen: Ministru Prezidensia Konsellu Ministru (MPKM), Fidelis Manuel Leite Magalhães. (Foto: MPKM) 

 

Sem comentários: