FTA sei kria kondisaun diak ba atleta iha kompetisaun nasional 2015

DILI - Prezidente Federasaun Atletizmu Timor-Leste (FTA) Àfranio Xavier Amaral, pormete sei kria kondisaun diak ba atleta 13 munisipiu, liu-liu 12 munisipiu hodi konsentra hotel bainhira kompetisaun nasional atletizmu ne’e realiza iha fulan Julhu tinan ne’e. Àfranio hatete, iha tinan ida ne’e federasaun hetan apoiu orsamentu husi Sekretaria de Estado Joventude no Desportu (SEJD) ho montante $170,000.00 hodi realiza atividade nasional rua no partisipa eventu internasional ida inklui Kongresu iha Xina.

Nia hatutan, eventu kompetisaun atletizmu nasional federasaun sei gasta orsamentu ho montante $50,000.00 hodi realiza eventu refere, ne’ebé sei partisipa husi Assosiasaun 13 munisipiu no kada munisipiu ida kompostu husi atleta nain 7, no husi orsamentu refere federasaun sei hare’e liu ba kondisaun, fasilidade no atendementu  atleta nian, tanba esperensia tinan kotuk sai mos perkupasaun ba federasaun ne’ebé iha diferensia ba atendementu atleta.

“Tinan ida ne’e federasaun lakoi atu akontese tan no la tolera ba hahalok ne’e, tanba atleta hotu iha direitu hanesan laos fo prioridade liu ba atleta Dili, hodi halo atleta  seluk sai penonton ida ne’e federasaun la tolera,” dehan Prezidente FTA ba Jornalista BT iha edifisiu jinasiu GMT, segunda-feira (15/06). Nia dehan husi orsamentu refere federasaun sei uja ho efisiensi hodi aloka didiak, para bele atende atleta nia hela fatin, han, hemu no fasilidade inklui ekipamentus hanesan  farda no sepatu  tuir osan ne’ebé iha, bazeia ba planu no programa ne’ebé federasaun prepara, tanba governu lokal seidauk iha osan para fo ba atleta sira, ne’e dunik federasaun sei koloka atleta sira atu konsentra iha hotel hodi nune’e fasil atu partisipa iha kompetisaun nasional. 

“Bazeia ba tinan kotuk ne’ebé hau observa katak, ita la kria kondisaun ne’ebé diak ba atleta 12 munisipiu seluk no la iha  konsiderasaun ba  sira hanesan ema, ne’e la diak, tanba deit ho itensaun ita hakarak gasta orsamentu governu no se ola-olah ita angap iha nasional ne’e mak paling super, no munisipiu seluk ita la perkupa  ida ne’e la bele akontese tan,  ne’e dunik maske ho situasaun hanusa  maibe sira mos iha direitu hodi senti osan ne’ebé governu fo apoiu hanesan mos atleta ne’ebé iha Dili,” afirma prezidente FTA.

Nia hatutan, iha eventu Xanana Internasional 10km sei realiza mos iha fulan Julhu tinan ne’e, ho montante orsamentu $100,000.00,  ne’ebé sei partisipa husi membrus Asian sira., entertantu orsamentu ho montante $20,000.00 federasaun uja ba partisipa iha eventu Internasional Asian Championship ne’ebé realiza ona iha fulan ne’e iha Yuhan Xina, inklui kongresu Wordl Championship ne’ebé sei realiza iha fulan Augustu 2015 iha Beijing  Xina. (BT)

Business Timor - Abilio