IN MEMORIA FERNANDO LASAMA DE ARAUJO

IN MEMORIA MINISTRU ESTADU, KOORDENADOR ASUNTU SOSIAL NO MINISTRU EDUKASAUN FERNANDO LASAMA DE ARAUJO

Timor Leste lakon lider joven ida, kontribui makaas laos deit iha tempu ukuan aan, maibe joven nee dedika nia aan tomak ba luta libertasaun. Fernando de Araujo La Sama aktual Ministru Edukasaun no Ministru Koordinador Asuntu Sosial, husik hela mundu nee iha loron Tersa 2 Junu 2015, iha Ospital Nasional Guido Valadares (ONGV).

Fernando La Sama de Araujo  nu’udar povo ki’ik no la’o ain tanan nian oan. Fernando de Araújo moris husi susar no terus, hahu hosi ki’ik ninian inan ho aman la konsege koinese alfabeto português to’o sira husik hela mundu ne’e, tanba la hetan biban iha tempu governu português ukun Timor, no mos tanba la’os liurai nian oan, ne’ebe bele tama eskola ho fasilidade iha biban neba. Sei ki’ik nia sai hosi eskola, ajuda nian inan-aman hamos du’ut iha to’os, kafe, halo natar no dala ruma sai karau atan.

La sama oan ba dala lima husi maun alin nain 8, feto lima no mane tolu. Oan husi Horacio de Araujo no Emilia da Conceicao, sai Prezidente Parlamentu Nasional iha Segundu lejistura 2007 too 2012.

Iha loron 20 Junu tinan 1988, Fernando La Sama de Araújo ho estudantes nasionalistas grupu ki’ik ida ho aten brani deklara “insurreição política dos estudantes de timor leste, hodi harii RENETIL.

Fernando la Sama hamutuk ho estudantes nasionalistas na’in 9 (sia) seluk-seluk ne’ebe harii organizasaun Renetil, hanesan Lucas da Costa, Julio Abel Ribeiro, Jose A.M.X. Gonçalves,  Adolfo Fontes, João Cardoso, João Araujo, Marciano Octaviano Garcia Da Silva, Agapito Cardoso no Carlos da Silva Lopes  Saky. Organizasaun Renetil harii iha Bali-Indonesia.

Organizasaun ne’e ba jovens no estudantes Nacionalistas Timor oan tomak ne’ebe estuda ka servisu iha Indonésia, ho estratejia katak liu hosi Renetil bele izola timor oan tomak husi influensia interese politika ideolojika, sosial no ekonomika ne’ebe okupantes sira lansa. Alein de izola timor oan sira hosi influensia ideolojia “pancasila”, ho estratejia seluk hanesan, liu hosi RENETIL bele habelar funu iha Timor-Leste sai mos isu nasional iha própria indonezia nian laran (Timorização do Conflito) iha Repúblika Indonésia.

Hahu hosi loron 20 Junho tinan 1988, nia jura ba nian an rasik, jura ba maromak, jura ba bandeira nasional RDTL, jura ba povo eroiku maubere no jura ba heróis matebian sira hotu katak nia sei luta ba Libertasaun Nasional no sei fiel ba prinsipiu ukun rasik an. Fiel no submisaun total ba ordem hosi komandu superior da luta. Jura atu luta to’o nian ran turuk ida ba dala ikus, (até a última gota de sangue). Kontra invazaun vergonhoza ho okupasaun ilegal no opresaun sistematika hosi rejime militar Soeharto nian iha Timor-Lorosa’e.

Hahu mos hosi loron 20 Junho tinan 1988 to’o tinan 2000, nia asumi xefia nu’udar sekretariu jeral Renetil, hodi koordena aktividades klandestina hotu hodi hahu dada no rekruta estudantes no jovens nasionalistas sira sai membrus no militantes Renetil nian.

Fernando la Sama diriji Renetil nu’udar organizasaun nasionalista ne’ebe luta ba ukun an iha klandestina iha funumaluk (inimigo) nian leet, ne’ebe envolve jovens no estudantes nasionalistas sira iha sidades hirak iha Indonésia nian laran tomak, ne’ebe timor oan sira hela ba, hanesan iha Denpasar-Bali, Mataram, Ujung Pandang, Surabaya, Malang, Madiun, Jember, Solo, Salatiga, Jogya, Semarang, Cirebon, Bandung, Jakarta, ho Lampung.

Sira na’in 10 (sanulu) ne’ebe harii Renetil hato’o ba komandu da luta kona ba ejistensia Renetil nian, depois de liu tiha semana hirak. Hahu hosi biban ne’ebe Fernando La Sama de Araújo diriji hala’o aktividades Renetil nian ba dala uluk, depois de komando superior da luta mos hatene renetil no rekuinese nian ejistensia, nia sempre konsulta ho comandante em chefe das falintil Kay Rala Xanana Gusmão, nu’udar dirijenti maximu luta ba independensia nian.

Iha loron 24 Novembro 1991, liu tiha loron 12 masakre santa cruz, intel militares indonésios nian kaer nia iha nian kos ka hela fatin, fatin ne’ebe sai mos hanesan sede ba Renetil iha biban neba, iha fatin ida naran Tamansari, iha zona Sesetan, Sanglah, Denpasar-Bali. Ema kaer nia iha kalan boot no lori nia ba liu interrogatoriu iha intel sira nian fatin, tortura nia no hatama nia ba kadeia iha Denpasar, antes de lori nian ba Jakarta.

Fernando la Sama de Araújo fou-foun ema hatama nia iha kadeia Polda Nusa Tenggara iha Denpasar, Bali iha loron 24 Novembru tinan 1991 to’o loron 22 Dezembru 1991.

Hahu hosi loron 22 Dezembru 1991 to’o loron 23 Marsu 1992 hanesan prizioneiru politiku iha kadeia Polda Jakarta. Hosi loron 23 Marsu 1992 to’o loron 25 Setembru ema muda nia ba kadeia salemba, Jakarta.

 Hahu hosi loron 25 Setembru 1992 to’o loron 23 Marsu 1998, Fernando La Sama de Araújo sai prizioneiru iha prizaun Cipinang, Jakarta, hamutuk ho kompatriotas, kamaradas no kombatentes sira seluk hanesan João Câmara (atual embaixador TL ba Tailândia), Marito Reis (eis secretário de estado dos antigos combatentes e veteranos da guerra) no mos Kay Rala Xanana Gusmão, eis  Primeiro-Ministro.

Fernando la Sama de Araújo mos sai koordenador ba seksaun komunikasaun sosial, komisaun planeamentu no koordenasaun kampanha (CPCC-CNRT), orgaun ida ne’ebe mos importante tebes iha movimentu pro independensia Timor-Leste nian. Servisu La Sama nian iha area ida ne’e mak hanesan halo planu no programa kampanha liu hosi: impresaun material (panfletus, poster no kartazes); radio (programa oras to’o ona – Radio Timor Kmanek no Radio Republik Indonesia); programa televizaun (Media Center, Dili); distribuisaun informasaun kona ba kampanha ba Timor laran tomak. La Sama mos hanesan responsavel prinsipal ba vox populi (diariu CNRT nian ba kampanha independensia) iha Julhu 1999.

Hosi tinan 1999 too 2001, La Sama kontinua fali nian estudu iha universidade Melbourne, Australia. No iha loron 10 Junho 2001, nia funda Partido Democrático – PD no asumi kargu nu’udar Prezidente Partido Democrático.

Iha tinan 2001, iha tempu governu konstitusional ba dala uluk (I GC-Red), hili nia sai hanesan vise Ministru Negosius Estranjeirus No Kooperasaun, vise ba Dr. José Ramos-Horta ne’ebe tutela kargu nu’udar MNEC iha biban neba.

Iha Julho 2007 eleitu sai Prezidente Parlamento Nacional liu hosi eleisaun ba prezidente iha uma fukun. Hahu hosi ninian eleisaun ba Prezidente iha uma fukun Parlamento Nacional no hanesan Prezidente Parlamento Nacional nu’udar orgaun reprezentativo, to’o ohin loron konsegue garante estabilidade politika iha uma fukun ne’ebe mos kontribui ba estabilidade nasinal, konsegue manter funsionamentu normal parlamento nacional, konsegue konsolida bloku Aliansa Maioria Parlamentar–AMP, hodi orienta Parlamento Nacional ba dezenvolvimentu nasional, no sempre bolu atensaun ba governu no mos lori membrus Parlamento Nacional hodi tau matan ba povo aileba sira iha zonas izoladas no mos bolu atensaun ba Governo atu tau matan ba juventude sira.

Iha Fevereiru 2007, liu hosi konferensia nasional Partido Democrático, reprezentantes hosi distritus hotu-hotu hakotu atu nia nu’udar Prezidente PD hodi konkorre ba Prezidente Republika iha eleisoins prezidensiais, hodi nu’une’e Fernando La Sama de Araújo lori PD no ema rihun ba rihun no grupu oi-oin husi vertentes hotu-hotu nian naran sai destakadu boot hanesan líder jerasaun foun ne’ebe tama iha jogu polítiku, iha nível aas iha nasaun ida ne’e. Maibe sirkunstansias ne’ebe ita hotu komprende halo ninian kandidatura la to’o rohan no dikin.

Ninian kandidatura ba PR hetan apoiu makaas hosi sikun hotu-hotu, hanesan hosi juventude, veteranus rezistensia sira, padres ho madres balun, hosi komunidade relijiaun minoria balun, estudantes, akademikus no intelektuais, lideres komunitarius, grupus marjinalizadus, no povo Timor ema rihun ba rihun fo nian apoiu ho vizaun ida katak to’o ona tempu atu jerasaun foun kaer ukun no bandu. Hanesan aileba no la’o ain tanan nian oan, Fernando La Sama de Araújo mos hatene terus ne’e oin sa, sinti iha isin lolon oin sa moris iha susar nian laran, povo nian mate fanun ninian konsiensia, atu sai neon na’in hodi tau matan ba nian povo terus na’in sira.

Iha Fevereiru 2008 nia asumi kargu nu’udar Prezidente Republika interinu depois de Prezidente Republika tanba Dr. José Ramos-Horta hetan atentadu kontra nia no sofre kanek hodi halo tratamentu iha Australia.

Durante nia asumi interinamente knaar nu’udar PR, Fernando La Sama de Araújo hola inisiativa, buka oin sa bele asegura estabilidade politika nasional iha biban ne’ebe nasaun Timor-Leste hasoru situasaun frajil (estado de sítio) no emerjensia.

Iha ninian lideransa mos grupo Alfredo Reinado ho Gastão Salsinha entrega sira nian kilat ho nian musan ho material selu-seluk, hodi nu’une’e sira entrega mos sira nian an ba justisa. Tanba, se laos lideransa ida hanesan nia mak atentadu 2008 kontra orgaun sobenarus rua, Prezidente Republika ho Primeiro-Ministro mak estabilidade nasional bele la hetan garantia, ne’ebe bele sobu estabilidade nasional.

Maubere anan La Sama nian mehi atu realiza ideais D. Boaventura nian ne’ebe funu hasoru estranjeiru atu harii ukun no bandu mesak ba rai no povu Timor.

Kargu ikus nebe La Sama assume maka Ministro Estadu, koordenadór asuntu sosiál no ministru edukasaun.

Adeus La Sama, lao ho Maromak no hela ho Maromak no hamutuk Aman Maromak hodi tau matan ba povu Timor-Leste hodi hetan Paz, Unidade no moris diak. Deskansa Em Paz La Sama.

Redaksi Suara Timor Lorosae