Erupsaun vulkániku iha Indonézia taka aeroportu prinsipál ida nasaun nian

Sinza sira nebe namkari hosi vulkaun foho Raung, iha Indonézia, iha loron-kinta ne'e, obriga taka aeroportu iha sidade boot daruak iha nasaun, Surabaya, beinhira ema millaun resin atravesa arkipélagu hodi selebra Ramadaun nia rohan.

Autoridade indonéziu sira haruka taka ona aeroportu Juanda, besik iha Surabaya, entre tuku 13:30 (oras lokál) no tuku 20:30 tanba atividade maka'as nebe rejista iha foho Raung, haktuir hosi porta-vós aeroportu nian Liza Anindya.

"Sinza sira bele afeta aviaun nia semo", nia esplika.

Transportadora aéreu indonéziu "Garuda" no kompañia low cost "AirAsia" fó sai ona kanselamentu ba semo sira hosi Surabaya no ba Surabaya.

Taka aeroportu internasionál iha Surabaya ne'e, illa prinsipál ida iha arkipélagu, Jawa, akontese loron balun hafoin aeroportu iha illa turístiku Bali taka mós tanba prezensa hosi sinza sira, nebe mai hosi vulkaun, halo turista millaun resin maka labele iha rai laran.

Aeroportu doméstiku nebe halo atividade iha sidade Malang, iha Java, taka mós, bainhira vulkaun seluk tama iha erupsaun no halo autoridade sira taka aeroportu iha illa remota Ternate nian (iha leste nasaun), haktuir hosi ministériu Transporte indonéziu nian.

Asaun sira ne'e akontese durante époka férias iha Indonézia, bainhira rezidente sira iha nasaun musulmanu ho populasaun barak liu iha mundu husi sidade prinsipál sira no halo viajen ba sira nia rai moris fatin hodi selebra Idul Fitri ho família sira.

Selebrasaun, nebe marka fulan Ramadaun nia rohan, sei akontese iha loron-sesta, iha Indonézia.

Iha fulan liubá, autoridade sira desidi hasa'e nível alerta nian tanba foho Raung, iha Java, iha kilómetru 180 hosi oeste Surabaya, bainhira vulkaun hahú lansa kalohan nakonu ho sinza no lava.

Aeroportu Bali nian, hanesan destinu prinsipál iha mundu ba férias, taka ona dala rua iha semana liubá. Turista millaun resin tenki hela iha aeroportu Ngurah Rai, tanba iha semo hamutuk 900 nebe kanseladu ka atrazadu.

Porta-vós hosi ajénsia dezastre indonéziu nian Purwo Nugroho hatete katak ohin foho Raung lansa hela suar maka'as ho aas to'o metru rihun rua. Agora daudaun, seidauk iha nesesidade hodi hasai populasaun, nia hatutan.

Tráfegu aéreu hetan perturbasaun beibeik tanba erupsaun vulkániku sira iha Indonézia, nebe iha vulkaun ativu hamutuk 130.

Sinza nebe namkari hosi vulkaun sira bele estraga aviaun sira bainhira sinza tama iha motór sira, hodi transforma ba vidru nebe nabeen, haktuir hosi espesialista sira.

SAPO TL ho Lusa