LERE BA LAGA VIZITA ABRIGU LA’OS HASORU MAUK MORUK

Komandante Polisia Nasional Timor Leste (PNTL) Eskuadra Postu Administrativu Laga, Munisipiu Baucau, Sarjento Polisia Duarte Ximenes ‘Soru’  imforma,  Xefe Estadu Major General Lere Anan Timur desloka ba Laga hodi vizita fatin abrigu tempu rezistensia nian la’os ba hasoru malu ho lideransa grupu ilegais Konsellu Revolusaun Maubere  (KRM) Paulino Gama ‘Mauk Moruk’.

Konaba Vizita Major Lere atu hasoru malu ho Paulino Gama Mauk Moruk, Duarte Ximenes dehan, imformasaun lalos maibe vizita Major Lere hakarak buka imformasaun i nafatin halo aproximasaun ba Mauk Moruk ho nia grupu maibe laiha imformasaun konkretu.

“Momentu ne’eba ami nunka rona imformasaun ne’ebe maka klaru, i hau rasik maka akompaña tenta nafatin maibe ligasaun mos laiha, telefone mos desliga hotu  i imformasaun ruma husi telefone mos laiha tanba ne’e major general deskansa iha nia abrigu dadersan desloka kedas  ba Lospalos” informa, Duarte Ximenes ‘Soru’ ba JN-Diáario Via Telefone, Kuarta (15/07).

Nia hatutan, deslokasaun major Lere vizita fatin abrigu maibe la hasoru malu ho Mauk Moruk tanba liu husi telefone mos telefone desliga tanba ne’e imformasaun major Lere hasoru malu ho Mauk ne’e lalos.

Komandante eskuadra ne’e informa liutan, durante kalan ida vizita fatin abrigu iha Suku atelari Laga, Major Lere kontinua kedas nia vizita ba iha munisipiu Lospalos.

“Major general ba iha Laga kalan ida iha suku atelari vizita abrigu uluk subar fatin  iha suku Atelari, aldeia Atelari  vizita nia abrigu, depois akompana mos imformasaun no situasaun ne’ebe maka akontese i situasaun ne’ebe maka lao iha Laga,” haktuir Duarte Ximenes.

Alende ne’e nia dehan, operasaun komando konjunta nafatin tuir rezoluzaun parlamentu nomos akompanamentu mos husi orden diretiva komando rua ne’ebe maka asina husi Major general no komandante geral rasik tanba ne’e maka kontinua buka nafatin hodi halo aproximasaun ba Mauk Moruk ho nia grupu.

Tanba ne’e, Polisia eskuadra Laga mos kontinua halo aproximasaun ba komunidade atu sira bele apoiu imformasaun  nune bele kaptura lalais Mauk Moruk ho nia grupu hodi entrega ba justisa julga tuir lei ne’ebe maka vigora iha Timor Leste.

Maiske komunidade balun la kopera imformasaun ba operasaun, tuir Duarte katak, esforsu ne’ebe maka PNTL eskudra Laga ka komando konjuntu halo I komunidade ida rua maka subar no apoiu hahan  mauk Moruk ho nia grupu nomos apoiu informasaun ba Mauk Moruk liu husi lina komunikasaun apoiu fasilidade komunikasaun ida ne’e maka impaktu ida operasaun konjunta atu kaptura Mauk Moruk ho nia grupu. Eus

Jornal Nacional