GOVERNU APOIA KARAU IDA, OSAN US$ 1000 BA MUSULMANU TL

Governu fó apoiu karau ida ho osan US$ 1000 ba musulmanu sira iha Timor Leste (TL) hodi selebra sira nian loron Idul Fitri 1346 H ne’ebé sei monu iha Sesta (17/7), tinan ida ne’e.

Diretur Jeral Gabinete Primeiru Ministru (GPM) José Asa hatete katak, nia reprezenta Primeiru Ministru Rui Araújo hodi fó apoiu ne’e ba musulmanu sira iha Timor Leste, maske apoiu ne’e labarak.  Maibé José Asa husu ba maun alin musulmanu sira ne’e atu labele haree husi kuantidade apaoiu ne’e, maibé haree husi unidade ne’ebé forte nafatin atu hamutuk dezenvolve nafatin nasaun doben ida ne’e.

“Ne’e (osan US$ 1000) atu hola buat ruma ba loron bo’ot ne’e, karau ida ne’e, no kolsaun 22 (esponja) ba orfonatus sira,”dehan José Asa hodi intrega envelope osan no hatudu ba Kursaun sira ne’e, ba Xefe Fundasaun Annur, Muhamad Anwar da Costa Kuarta (15/7) iha Mesjid Kampung Alor Dili.

José Asa haktuir, tuir lolos Primeiru Ministru Rui Araújo rasik mak direitamente intrega apoiu sira ne’e, maibé Xefe Governu ne’e okupadu hela ho servisu seluk.

“Governu liu husi Gabinete Primeiru Ministru, fó apoiu solidaridade ba ita nia komunidade musulmanu no orfonatus Annur iha Kampung Alor, ne’ebé mak 17/7 ne’e, sei selebra loron Idul Fitri ba musul manu Timor Leste tomak,”katak José Asa.

Nia haktuir, kada tinan Governu sempre fó apoiu ba musulmanu sira iha Timor Leste, hodi selebra sira nia loron importante ida ne’e.

“Tinan-tinan ita nia relizioju sira hanesan Musulmanu, Katolika no Kristaun, sempre selebra loron sira ne’e, natal hamutuk, no konvida lider relizioja sira, atu partisipa natal hamutuk. Ida ne’e atu hatudu katak, ita ne’e iha unidade no solidaridade bo’ot liu, hatudu ba mundu katak, iha Timor Leste ne’e, relijiaun barak, maibé solidaridade ne’e forte, no unidade maka’as,” dehan José Asa.

Nia hatutan, solidaridade no unidade entre relijiaun sira iha Timor Leste ne’e, sai ezemplu bo’ot ida ba nasaun hotu iha mundu.

Iha oportunidade ne’e mós, José Asa lori Governu nia narna, hato’o boas festa loron idul fitri ba tinan 2015 ne’e.

Alende ne’e, Xefe Fundasaun Annur, Muhamad Anwar da Costa, agradese tebes ba ajudus ne’e, tanba kada tinan Estadu liu husi Governu sempre fó apoiu ba sira hodi  selebra loron Idul Fitri ne’e.

“Ami agradese teb-tebes Governu nia prezensa iha ne’e, tinan-tinan Sr. Prezidente Repúblika no Primeiru Ministru mai bebeik iha ne’e, ho Primeira Dama, hodi haree labarik orfonatu sira hodi fó apoiu hanesan kolsaun, orsamentu no seluk tan,”katak  Muhamad Anwar da Costa.

Nia hatutan, nia agradese tebes, tanba tinan ida ne’e mós Estadu Timor Leste kontinua fó apoiu ba musul manu iha Timor Leste.

“Ami hato’o ami nia agradesementu ba Primeiru Ministru Rui Maria de Araújo, apoiu ne’e la’os hanesan apoiu ki’ik oan ida, maibé Governu nia prezensa iha ne’e hodi haree ami mós, ami nia laran kontenti ona, tanba ita iha unidade no solidaridade no toleransia maka’as iha Timor Leste,”relata Muhamad Anwar da Costa.cos

Jornal Nacional