LIXU IHA DILI KONTINUA NAMKARI LEMORAI

Reprezentante povu iha Uma Fukun Parlamentu Nasionál (PN) kontinua kestiona lixu ne’ebé mak sei namkari lemorai iha Kapital Dili laran tomak, liu-liu iha fatin públiku sira ne’ebé mak sai objeitu ba vizitantes.

“Ita la ignora total servisu  funsionáriu sira ne’ebé limpeza, husi  Diresaun SAS nian, Ministériu Estatal Administrasaun Munisípiu, maibé lixu kontinua namkarik lemorai iha capital Dili. Ne’ebe tenki haree mós ekipamentus, tanba ekipamentus ne’e atu ba ajuda hodi transporta lixu sira ne’e, maibé kuandu laiha ekipamentus mak maka  sei kontinua nune’e,” hateten  Deputadu Bankada Partidu Demokrátika (PD) Virgílio da Costa Hornai ba JN-Diário Tersa feira iha PN (15/7).

Deputadu Virgílio Hornai hatutan katak, pesoal sira ne’ebé maka atu koloka iha fatin públiku sira ne’e mós sei menus. Maibé dehan nia, tuir loloos, ema ne’ebé tama konta iha Jardim, nia tenki iha Jardim ne’ebá, nia servisu iha ne’ebá para nia rega, depois  nia halo manutensaun ba aifunan sira ne’e, duut sira ne’e.

“Depois iha ne’ebá mós tenki iha pesoal  seguransa. Ne’e tenki iha para halo kontrolu ida. Sé ha’u vizita ba Jardim karik, la’os ba iha ne’ebá para fatin atu han hemu iha ne’ebá. Sé ba lori makanan ringan ruma bele, maibé mós tenki disiplina,” deputadu ne’e hateten.

Virgílio Hornai haklean katak, problema maka parte funsionariu sira limpeza jerál laiha ka menus konsénsia komunidade nian ne’ebé hakarak ba tur iha jardim nia ne’e mos laiha, han hotu iha ne’eba depois soe kedas lixu iha ne’eba ida ne’e maka sai kestaun bo’ot.

“Negosientes ki’ik sira ne’ebé iha tasi ibun ne’e, sira maka kontribui lixu ba Jardim sira ne’e. Tanba sa maka ha’u hatete sira maka kontribui, tanba sira halo hela negósiu iha tasi ibun sira ne’e, sira iha ne’ebá, iha bee manas, depois ema han pop mie, manutolun da’an, hemu kafé, sira ne’e hotu kontribui ba lixu,” dehan Virgílio Hornai.

Deputadu bankada PD ne’e hatutan tan katak, ema sira ne’ebé fa’an iha ne’ebá mós kontribui ba lixu, ema sira hakarak ba tur iha Jardim ne’e mós kontribui lixu, tanba wainhira sira konsumu iha ne’ebá ne’e sira soe deit plástiku, lata, aqua mamuk no selu-seluk tan.

“Husu ba Ministériu kompetente atu fó atensaun di’ak liu-liu, unidade ida, ha’u sujere para unidade nasionál jestaun Jardim, jardineiru, jardineiru ema sira ne’ebé maka servisu ba jardim deit,” nia haklaken.

Virgílio Hornai fundamenta katak, iha loron Sesta, Sábadu, Domingu buat ida funsionamentu autoridade seguransa públiku iha ne’e laiha ona, vendedores sira tenki dudu nafatin gerobak ou lori nafatin nu’u hirak ne’e ba iha tasi ibun ne’ebá.

Reprezentante povu ne’e husu ba Ministériu Administrasaun Estatal liu-liu iha Munisípiu ne’e iha unidade de seguransa sivil sira ne’ebé rotativu, sira iha chief ida ba Sábadu ho Domingu, para atu nune’e sira bele halo nafatin kontrolu ida regulár ba iha fatin hot-hotu.

Iha fatin hanesan Deputada Bankada CNRT Virginia Anabela hatete katak, lixu liu liu Largo Lecidere, kuandu la’o iha fatin ne’eba, lixu barak tebes hanesan fali iha merkadu. Maibé to’o nutísia ne’e fósai Jornal ne’e seidauk hetan konfirmasaun husi parte Governu ne’ebé kompetente.eni

Jornal Nacional