RESEITAS DOMESTIKA 2015 US$ 170 MIL

Ministra Finansas (MF), Santina Cardoso informa katak,  resitas domestika iha rai laran ba tinan 2015 nian hanesan  impostu, hahú husi fulan Janeiru to’o agora foin mak atinji US$ 170 mil.

“Reseitas Timor Leste nian ba tinan ida ne’e, hahú husi Janeiru to’o agora, hamutuk 170 mil resin,”informa Santina Cardoso ba jornalista sira iha Palasiu Governu, Tersa (14/7).

Alende ne’e, Santina mós informa katak, kazu Alfandega nian kona-ba deskonfia funsionáriu Alfandega involve an iha hatama mina illegal ne’e, tenke halo investigasaun tiha lai, tanba to’o agora seidauk iha relatoriu ida husi Alfandega nian tama ba  Ministériu Finansas.

“Alfandega tenke halo investigasaun, tanba to’o agora ami seidauk simu relatoriu ida husi Alfandega,”dehan Santina.

Kazu Alfandega ne’e iha fulan kotuk, Ministériu Públiku ho Polisia Municipiu Bobonaro prende ona mina illegal toneladas rua, ne’ebé diskonfia funsionáriu Alfandega mak hatudu dalan no involve iha laran.

Investigasaun ba kazu ida ne’e, Ministériu publiku sei tu’un diretamente hodi investiga funsionáriu Alfandega sira ne’e, tanba oras ne’e dadauk funsionáriu Alfandega balu entrega an ona ba Ministériu Públik, no balu halai tiha ona ba Indonesia.

Santina mós informa katak, iha Fronteira terestre mós iha enfrenta problema kona-ba makina ex ray ne’ebé atu detekta sasan sira tama husi Indonesia  mai Timor Leste.

“Kona-ba makina Ex Ray ne’ebé mak at hela no lafunsiona, agora dadauk ami haree hela kontratu para ho kompañia atu bele halo manutensaun ba makina Ex ray ne’e, atu nune’e bele fungsiona fila fali,”relata Santina.

Nia esklarese, tanba makina ne’e marka Smith, entaun Governu tenke buka meus atu kontaktu ho fabrika Smith ne’e rasik hodi bele mai halo manutensaun ba makina ida ne’e.

Nia esklarese, dadauk ne’e Governu kotaktu ona ho ajensia fabrika ne’e iha Singapore hodi mai halo manutensaun ba maikina ida ne’e.

Nia hatutan, makina ex ray ne’e importante tebes, tanba makina ne’e mak halo teste ba kareta sira ne’ebé tama mai husi Indonesia, tenke liu hotu husi makina ex Ray ne’e.

Santina haktuir,  oras ne’e dadauk Timor Leste nia makina sira ne’ebé tau iha fronteira mak hanesan, gantry bo’ot ne’ebé mak kareta kamioneta sira ne’e bele tama iha laran hodi halo scan ba sasan sira ne’ebé sira hatama mai husi Indonesia.

“Ita mós iha hand carry ba pasajeirus sira ne’ebé tama mai ho pasta kiik oan sira ne’e bele detekta, no ex ray kiik oan sira ne’e para, bele detekta sasan ki’ik oan sira hanesan, droga no sasan kiik seluk tan,”informa Santina.

Nia haktuir, Timor Leste nia fasilidade iha Fronteira diak tebes, maibé Governu liu husi Ministériu Finansas presiza duni atu halo manutensaun ba makina  ex ray ida bo’ot ne’e, hodi bele halo manutensaun atu bele funsiona fali.cos

Jornal Nacional