KOMISAUN PROMOSAUN DEVIZA ENTREGA ONA BA PNTL

Prezidente Komisaun ba Promosaun Deviza Polisia Nasional Timor-Leste (PNTL), Isabel Ferreira iha intervensaun Seremonia despedida ho Polisia Nasional Timor Leste (PNTL) hatete, komisaun promosaun deviza intrega ona ba Komando Jeral PNTL.

“Ha’u mak lidera hamutuk ho Komisario Afonso, Dr.Anacleto no Madre Guilermina ikus liu sekertariado mak lidera to’o entrega fali ba komando tamba agora tama ona iha faze normal ne’ebe komando mak sei lidera, karik iha formasaun ruma, husi PNTL maka lidera rasik tuir lei haruka,”hateten Primeira Dama Isabel Ferreira, iha diskursu, Sesta 03/07/2015, iha Quartel Jeral PNTL, Kaikoli, Dili.

Iha oportunidade ne’e mos lahaluha, Primeira Dama agredese ba apaiu husi ekipa tekniku no Komando Jeral PNTL, depois 2010 remata mak harii fali komisaun akompañamentu promosaun deviza ba PNTL ne’ebe atu haree iha faze implementasaun.

Primeira Dama hatutan, servisu ne’e bele finaliza tamba tuir saida mak politiku sira hakarak liu liu IV Governu konstitusional ne’ebe iha kompromisio ida hakarak halo reforma setor seguransa liu liu ba area PNTL.

“Fo fiar mai no ami hala’o, esforsu ne’e la’o diak tamba iha koperasaun diak husi komando PNTL desde lideransa Komisariu Afonso to’o agora, agradese mos ba ekipa tekniku husi sekertariado, agredese mos ba Komando Jeral PNTL ba apoiu hotu hahú komisaun ne’e to’o lideransa agora, rekoñese visto nebe ami iha maibe ha’u hakarak hatete ida ne’e ami la husu,”dehan Pimeira Dama tan.

Primeira Dama reforsa liutan, komisaun ne’ebe mak la’o ona hanesan mehi ida atu hametin instituisaun PNTL sai institusaun ne’ebe forte, kredivel ho ema ne’ebe profesional, ida ne’e mak sai hanesan orgolhu bo’ot ba Timor oan hotu.

“Se ita hakarak hametin paz no estabilidae iha nasaun ne’e depende mos PNTL entaun PNTL iha misaun ida importante. Tamba PNTL hanesan mata dalan ba sidadaun hotu,”Primeira Dama enkoraza.

Nia hatete katak, PNTL iha misaun importante tamba hanesan sidadaun ou ema ne’ebe servisu iha institusaun seguransa nian dala barak la valoriza papel ida ne’e, hanoin tama servisu tamba deit salariu ou pozisaun ida, ida ne’e la valorisa didiak servisu, tanba fatin Instituisaun ne’e hanesan fatin ka mahon ba povu no nasaun.

Iha fatin hanesan, Komandante Jeral PNTL Komisariu Julio Hornai iha nia diskurso hatete, lori Instituisaun PNTL nia naran agredese bo’ot ba presidente komisaun ho ekipa tomak maske iha protesta barak ladun kona komisaun promosaun nia laran husu deskulpa.

Ami hotu rekoñese komisaun nia servisu maka’as no pasiensia bo’ot hasoru prosesu bo’ot ne’e no konsege halo promosaun ba postu 12 ba membrus PNTL instituisaun PNTL ida ne’e, iha 2012 halo promosaun ekstraordinariu hodi kompleta nesesidade strutura PNTL nian.

“Entrega mai fali ami PNTL atu hahú ida ne’e mak ami sente hanesan buat ida importante maske komisaun la eziste ona, maibe ami sei husu nafatin apoiu atu bele fo hanoin idea ba komisaun ne’ebe PNTL rasik sei harii,”dehan Julio Hornai.

Julio Hornai ho esperansa bo’ot esklarese foin atu hahú ho promosaun ida ba PNTL, ida ne’ebe la’o dadauk, ho esperansa bo’ot ida iha prosesu ne’e bele la’o diak.Nes

Jornal Nacional