PR TAUR MATAN RUAK: “IMI SUNU TAN, HA’U MAK BUKA IMI”

Prezidente Repúblika (PR), Taur Matan Ruak, apela ba Konselhu Revolusaun Maubere (KRM) atu la bele repete tan hahalok anarkismu ne’ebe maka akontese iha Baguia, foin lalais ne’e.

Iha loron 8 Marsu 2015, povu Baguia pániku no tauk tebes ho asaun “brutalismu” ne’ebe deskonfia lansa husi grupo KRM hodi halo asalta ba Eskuadra PNTL Baguia ne’ebe rezulta membru Corpo Seguransa Pesoal (CSP) nain ida kanek todan no sunu uma, kareta baskolante ida ho motor hat.

“Imi sunu ha’u nia maun nia uma, imi sunu ne’e dala ida deit, imi halo tan ha’u mak buka imi,” afirma PR Taur Matan Ruak liu husi nia diskursu bainhira halo vizita ba hasoru malu ho komunide Suku Alawa Kraik, Postu Administrativu Baguia, Munisípiu Baucau, Kinta (25/06/2015).

Nudar mos Komandante Supremu F-FDTL, Taur Matan Ruak, afirma katak, Komando Operasaun Konjunta (KOK) kompostu husi PNTL ho F-FDTL sei la retira husi Baguia wainhira Mauk Moruk ho Lemorai seidauk entrega an.

“Ha’u hanesan Xefi Estadu Maior RDTL nian, ha’u maka haruka labarik Atino ne’ebe hamutuk ho KRM ba eskola, hau haruka katuas Siribu nia ferik oan ne’ebe uluk subar Lere Anan Timur ba konsulta iha hospital, hau haruka Cowboy ba baixa iha hospital iha sala VIP depois maka hau haruka nia ba Becora,” hateten Taur Matan Ruak.

Taur fo hanoin fali kona-ba matebian Alfredo Reinaldo Alves ho Salsinha, halo embuskada ba Primeiru Ministru (PM) Xanana Gusmã0, tiru PR Ramos Horta, no asalta Jeneral Taur Matan Ruak nia uma.

“Wainhira Alfredo mate tiha, hau mak tuir sira mai hotu. Ne’e hau nia soldadu sira, kuandu hau sae kandidatu Presidente sira mai ajuda, tanba hau hateten ba sira, hau mak imi nia maun uluk ita funu hasoru Indonesia, ami matenek, lori imi ita manan tiha, agora imi hetan fali matenek seluk dehan ami mak a’at, maibe monu ba kuak ami mak imi nia maun, sira ne’e uza imi hanesan lensu hamos tiha ibun la persiza soe tiha, hanesan toalha hamos tiha isin soe tiha,” hateten PR Taur Matan Ruak.

Hato’o Keixa hahalok F-FDTL

Liu husi dialogu komunitariu ho komunidade Suku Haekoni, Postu Administrativu Baguia, komunidade sira hato’o keixa ba PR Taur Matan Ruak kona-ba aktu violensia direitus humanus ne’ebe halo husi membru F-FDTL ba komunidade to’os nain sira.

“Hau nia maun sira forsa armadas dala ruma halo violensia iha fatin, maibe to’o iha fatin mos ami la halo violensia kaer ami lori ami ba iha Baucau la iha investigasaun. Tuir hau nia hanoin se’e bele karik iha investigasaun uluk para nune’e ema ne’ebe mak halo krimi mos bele lori ba, maibe ema ne’ebe mak la halo krimi tenki husik para bele serbisu hamutuk ho nia familia,” hateten Mariano ba PR Taur Matan Ruak, Kuarta (24/06/2015).

PR Taur dehan, ema ne’ebe mak forsa kaer lori ba Baucau seidauk fila ne’e keta nia halo sala ruma karik. Tanba Forsas Armadas laos bulak mak baku ema arbiru.

“Hau nia adjuntu Kasa militar mos iha ne’e buka hatene naran atu nune’e ita bele buka hotu,” dehan PR Taur.

Uluk operasaun Hanita ne’ebe mak halao husi Falintil Forsa Defesa Timor Leste (F-FDTL) no Polisia Nasional Timor Leste (PNTL) hodi buka tuir Mauk Moruk ho nia membrus ne’e, PR Taur haruka membru F-FDTL ida akompanha hare forsa armadas no Polisia baku ema ka lae.

“Hau ba iha Lospalos ne’eba hau husu diskulpa ba joven ida mai husi Inglatera, Polisia halo cek point iha Laivai kua tiha nia sepatu talin hasai lori tiha depois tesi nia fuk ne’e hanesan krus,” tenik PR Taur . avi

Jornal Nacional