BNCTL LA FASILITA EMPREZARIU NASIONAL HALO INVESTIMENTU

Seitor privadu nasional halo ona esforsu oi-oin atu bele partisipa ativu iha dezenvimentu nasional, liu-liu halo investimentu, maibe dezafiu boot ba seitor privadu nasional sira maka sira la iha kbi’it finanseir no mukit esperensia.

Fundador Camara Comerçio no Industria Timor Leste (CCI-TL) nudar mos Director empreza Santa Filomena, Jaime dos Santos, hateten, oituan ka barak, seitor privadu nasional hatudu sira nia patriotismu, nasionalismu no ambisaun boot atu dezenvolve rai doben ida ne’e, maibe obstaklu boot maka la iha suporta finanseira husi Governu, inklui instituisaun finanseira sira ne’ebe maka ejiste iha Timor Leste.

“Ita nia Governu la kria kondisoens duni ba seitor privadu nasional atu bele halo investimentu no iha kbi’it kompete ho empreza internasional sira ne’ebe maka mai ita nia rain buka oportunidade. Ita iha duni BNCTL (Banco Nacional Coerçio Timor Leste), maibe ejistensia BNCTL nian hanesan halo negosiu ki’ik, la halao funsaun hanesan banku duni hodi bele fo kreditu boot ba seitor privadu nasional atu bele fasilita halo investimentu,” hateten Jaime dos Santos, ba JNDiario iha Dili, Kuarta (18/8/2015).

Jaime hateten, BNCTL ne’e nia tarjetu halai tui-tuir deit maka funsionariu publiku sira nia salariu, halai tui-tuir maka 15-16% husi negosiantes ki’ik sira nia lukru. Mas, ba investimentu BNCTL la halo.

Jaime fo sasin katak, wainhira nia halo projetu investimentu haki’ak fahi modernu iha Liquiça, tenta hatama proposta ba BNCTL atu empresta US$ 350.000,00, maibe BNCTL la bele atende, masske nune’e, pelumenus bele fasilita hetan netik US$ 150.000,00. Ne’e mos la hetan kedas no BNCTL brani fo US$ 20.000,00, mas ho kondisoens katak, foti fulan ne’e maka fulan oin tenke selu kedas.

“Husi hau nia proposta atu haki’ak fahi ne’e ninia evolusaun atu re-investe ne’e presiza tempu, tanba tenke koidadu to’o tinan maka nia bele fo oan no tenke investe didiak fahi oan boot maka fa’an hodi hetan osan para selu banku. Maibe, BNCTL la simu razaun sira ne’e. ida ne’e maka dehan, banku ne’ebe Governu kria la iha vontade atu suporta investimentu iha rai laran,” hateten Jaime dos Santos.

Eis vise prezidenti CCI-TL ne’e reafirma katak, nia parte la fo kulpa ba banku estranjeirus sira ne’ebe maka ejiste iha Timor Leste, hanesan Banku Mandiri, BNU (Banco Nacional Ultraarinho) ho Banku ANZ, ne’ebe la fasilita kreditu ba seitor privadu nasional, tanba Timor nia lei ba rai ne’ebe bele sai garantia ba banku seidauk iha. Hodi nune’e, defisil tebes atu banku bele fo kreditu.

Ironia liu, katak Jaime dos Santos, Governu harii tiha banku BNCTL ho fundu husi povu nia osan rasik, mas la valoriza inisativa seitor privadu nasional nian ne’ebe maka iha intensaun diak halo investimentu no loke kampu servisu ba komunidade.

Ho kondisoens la hetan suporta husi instituisaun finanseira, hateten Jaime dos Santos, seitor privadu nasional nadodon hotu ba hadau malu projetu fiziku Estadu nian. Nune’e, hirak ne’ebe iha amigo diak iha Governu fasil hetan projetu no hirak ne’ebe la iha aman sarani hein rai mamuk deit.

Nia halo komparasaun oituan ho ejistensia banku sira iha Indonesia hanesan BPD (Bank Pembangunan Daerah), BRI (Bank Rakyat Indonesia) no banku estatal seluk tan Indonesia nian, la’o tuir nia kliente ho povu sira atu bele konvense halo kreditu ba banku. Maibe, iha Timor Leste ba tanis tan iha banku nia odamatan mos la hetan kreditu to’o mate.

Kona fali ba pagamentus ne’ebe atrazu tebes ba empreza nasional sira ne’ebe maka ejekuta projetu Estadu nian, Jaime hateten, ida ne’e fenomena ne’ebe lori risku mos ba dezenvolvimentu seitor privadu nasionais. Basa, ho pagamentus atrazu ne’e halo todan seitor privadu nia finanseira ne’ebe mukit tebes no hirak ne’ebe la aguenta bele lulun biti.

“Hau hakarak dehan katak ami mos hetan projetu ki’ik oan ida no hakarak hetan pagamentu advance 30% ne’ebe asina kontratu iha loron 16 Junhu 2015, maibe iha 16 Agusto ne’e tama ona ba fulanb rua (2), no ba fulan tolu tenke expire ona, mas to’o agora advance payment 30% ne’e seidauk tama. Ne’e difikuldade boot ba ami,” hateten Jaime dos Santos.

Nia husu ba Governu atu bele simplifika birokrasia pagamentus hodi ajuda dezenvolve seitor privadu nasionais. Infelismente, diak liu kria sistema online para ajuda lalais halo pagamentus ba projetu Estadu nian ne’ebe fo fiar ba seitor privadu nasionais sira ejekuta. mia

Jornal Nacional