Be Mos Sai Problema Bo’ot Iha Nasaun Ne’e PM Vizita DGAS

Dili, Tempo Timor - Primeiru-Ministru Dr. Rui Maria de Araújo, Tersa-Feira ne’e (11/08) halao vizita ba Diresaun Gerál Água no Saneamentu (DGAS), iha Kaikoli, Dili.

Objetivu husi vizita ne’e atu rona hosi responsáveis kona ba oinsa bele buka solusaun hodi rezolve dezafius relasiona ho distribuisaun no assessu ba bé mos ne’ebe oras ne’e populasaun barak mak sei enfrenta iha Timor-Leste.

Iha vizita ne’e, Primeiru-Ministru akompaña husi Vise-Ministru Obras Públikas, Transporte no Komunikasaun I, Sr. Januário da Costa Pereira.

Diretor Jeral DGAS, Sr. João Pereira Jerónimo iha biban ne’e halo aprezentasaun ba Primeiru-Ministru kona-ba programa ne’ebe halao oras ne’e no prioridades ba tinan 2016 nian.

“Bé mos importante ba moris komunidade no populasaun nian; durante ne’e buat balun funsiona ho dia’k no buat balun presiza funsiona ho dia’k liu tan hodi responde ba nessesidade bé mos iha Timor laran tomak,” hatete Primeriu-Ministru.

Kona ba perspetiva longu prazu, Primeiru-Ministru husu ba DGAS aprezenta Master Plan ida hanesan meta komun hodi rezolve nessessidadi bé iha Timor laran tomak.

“Se ita bele investe ba eletrisidade, ita bele investe ba bé ba tinan hirak tuir mai? See ita la konsege hamosu ida ne’e, tinan 20 tuir mai ita sei infrenta problema hanesan,” hateten tan Primeiru-Ministru.

Husi Diresaun Jerál Água no Saneamentu DGAS, Primeiru-Ministru hamutuk ho Vise Ministru no ekipa DGAS nian ba observa rede ba akaptasaun, tratamentu ho distribuisaun bé ne’ebe harii ona iha sidade Dili laran.

Dezafiu ne’ebe identifika kona ba problema ema balun sei nafatin la assessu ba bé mos mak mossu iha liña distribuisaun nian no Primeiru-Ministru husu ba responsavel sira hosi DGAS atu bele hare’e didiak problema ida ne’e no seluk ne’ebe identifika ona.

“Nu’udar Xefe Governu ha’u buka atu entende problema sira ne’e hotu hodi nune’e ita bele hanoin ba oin. Problema bé ne’e la’os iha Dili laran deit maibé iha Timor laran tomak. Se ita nia depozitu bé sufisiente iha Timor laran, oinsa ita planeia para halo nia kaptasaun ne’ebé dia’k, halo nia tratamentu no distribuisaun ne’ebé dia’k para depois bele fó asesu ba bé mos ba populasaun tomak,” haktuir Primeiru-Ministru. 

Written by  Tempo Semanal