LEI KAK FORTE SEI TATA KORUPTOR

Projetu lei Komisaun Anti Korupsaun (KAK) ne’ebe bankada sira aperenta ba meja Parlamentu Nasional atu ajenda ba diskusaun iha jeneralidade no kontinua ba espesialidade kuandu nehan kroat mak sei tata koruptor sira nebe gosta nhalo korupsaun.

“Ami hanoin katak lei ne’e atu forte tenke depozitivu rua, ida mak pembuktian terbalik e ida fali mak rekoperasaun de bens (pengembalian harta dan benda negara-Red) tanba hanesan ne’e ema koruptor ida mak dupla halo korupsaun, por ezemplu nia naok 5 juta e tama kadeia tinan 10, se nia harta benda la sita, tinan 10, osan 5 juta ne’e bele sai ona 50 juta, sai bos nafatin deit ne’e labele,”afirma deputadu bankada FRETILIN, Francisco Miranda Branco ba Jornalista sira Tersa (11/8) horseik iha PN.

Francisco Branco hatutan povu luta atu koruptor ninia sasan nee tenki sita hotu para nunee bele senti ninia konsekuensia nee senti todan, se lae nia halo tiha korupsaun tinan 10 kadeia remata sai patraun nafatin.

Projetu lei KAK ne’e bankada CNRT, FRETILIN, PD no Frenti-Mudança assina tiha ona no despaixa ba meja PN atu ajenda projetu lei ne’e para bele debate iha jeneralidade, maibe meja retira hikas.

“Lei Anti Korupsaun ne’e projetu ida ne’ebe bankada 4 mak asina mas to’o ba prezidente e prezidente rasik kestiona fila fali e bankada 3 ne’ebe asina projetu ne’e mos kestiona fila fali. Sira kestiona tanba dehan lei ne’e hakanek ita nia konstituisaun, kontra konstituisaun. Husi bankada FRETILIN mantein nafatin ne’ebe agora projetu de lei ne’e iha hela asesor sira sei haree fila fali espera katak iha sesaun lejislativa ne’ebe atu hahu fila fali iha setembru ne’e bele aprova ona atu sai instrumentu ne’ebe forte no efikas atu ita nia autorres justisa sira nian bele kaer hodi hasoru koruptor sira.

Iha sorin seluk deputada bankada Partidu Demokratiku (PD), Lurdes Bessa hatutan katak, lei refere persiza duni aslera hodi fo forsa ba KAK atu halao ninia servisu diak liu tan para bele kombate korupsaun iha rai ida ne’e.

“Instituisaun iha tiha ona halao nia servisu kleur ona persiza lei ida ne’ebe que forte para bele ajuda mos dezempenho institusoens hotu-hotu hodi kombate korupsaun,”haklaken deputada Lurdes Bessa.

Deputada Bessa hateten, ho esperansa projetu lei refere meja PN ajenda hodi bele debate iha tempu badak para bele aprova.

Entretantu deputadu Eduardo de Deus Barreto “Dusae” argumenta mos katak, lei KAK importante duni aslera para fo dalan ba KAK halao ninia servisu.

“Lei KAK ne’e tenke urjenti, tanba lei kuandu seidauk iha sira labele halo servisu ho diak, tanba ne’e mak PN fo prioridade ba lei KAK,”akresenta deputadu Dusae. bal

Jornal Nacional