Kim Jong-un tau tropa norte-koreanu sira prontu hodi halo kombate

Líder norte-koreanu, Kim Jong-un, haruka ona iha loron-sesta ne'e nia tropa sira hodi prontu ba kombate iha fronteira ho Koreia-Súl, fó sai hosi ajénsia notísia ofisiál KCNA.

Komisaun sentrál militár norte-koreanu nian, nebe diriji hosi Kim Jong-un, aprova ona ultimatu ida hafoin husu ona ba Seul hodi hapara funu propaganda no ba ameasa ba operasaun militár konsertadu sira.

Desizaun ne'e mosu iha momentu nebe tensaun sira aumenta iha península koreanu, tanba troka tiru sira artillaria nian entre Pyongyang ho Seul, nebe halo forsa armada sira iha alerta maka'as.

Tuir KCNA, "númeru ida" hosi rejimi komunista haruka ona nia unidade ezérsitu sira povu koreanu nain (APC), destaka iha zona desmilitarizadu sira (DMZ) entre nasaun rua ne'e hodi permanese "iha estadu funu nian" hahú hosi tuku 17:00 (oras lokál) iha loron-sesta ne'e.

Tropa sira ne'e tenki "prontu tebes ba kombate no hodi halo operasaun supreza sira", bainhira liña sira oin nian tenki iha "estadu besik funu nian", Kim Jong-un hatete no haktuir hosi KCNA.

Medida ne'e mosu hodi apoia ultimatu nebe aprezenta iha loron-kinta ba Seul, nebe Kim Jong-un eziji hapara funu propaganda no ameasa sira ba operasaun militár konsertadu sira.

Komisaun sentrál militár (CCM) hosi Koreia-Norte, nebe prezidi hosi Kim Jong-un, aprova ona ultimatu no karik "atake sira vingansa nian no kontra-atake iha zona DMZ tomak".

Ministériu Defeza súl-koreanu lasimu ultimatu norte-koreanu, nebe hotu iha loron-sábadu tuku 08:30 (oras lokál), hodi hatete katak altifalante súl-koreanu sira, besik iha fronteira, sei halo nafatin mensajen propaganda nian.

Xefe sira Estadu-maior hosi forsa armada súl-koreanu sira hatán ona ba APC, husu atu iha abstensaun ba "hahalok sira nebe laiha reflesaun" no hatete katak sira sei "la nonook" hasoru provokasaun foun sira.

Iha loron-kinta, Pyongyang hahú tiru projetil sira ho diresaun ba altifalante ida súl-koreanu nian. Seul hatán ho tiru oioin.

Projetíl sira nebe uza hosi nasaun rua ne'e monu iha parte DMZ, nebe naruk iha kilómetru rua entre fronteira sira nasaun rua ne'e nian.

Bainhira hahú fulan ne'e, soldadu súl-koreanu na'in rua hetan kanek todan iha atake ida ho mina antipesoál, no Seul duun ba Pyongyang, maibé rejimi norte-koreanu nega.

Atake ne'e halo Seul hahú fali funu propaganda nian liuhosi altifalante sira nebe iha fronteira, hafoin altifalante 11 nonook.

CCM subliña katak hakmatek sei hetan fali bainhira Seul hapara mensajen propaganda nian, hatutan katak komandante sira hosi forsa armada norte-koreanu sira simu ona orden hodi prepara ba "destruisaun sasán sira funu psikolójiku nian" no karik ho kontra-atake sira, haktuir hosi KCNA.

Atake diretu ikus hosi Norte hasoru Súl akontese iha fulan-Dezembru 2010, bainhira rejimi norte-koreanu soe bomba iha illa súl-koreanu Yeonpyeong, halo soldadu na'in rua no ema sívil na'in rua mate. Seul hatán ho lansamentu projetíl hasoru pozisaun sira norte-koreanu nian.

Iha tinan 2013, joven dirijente norte-koreanu deklara tiha "estadu funu nian" ho Súl.

Tuir tékniku, liutiha tinan 65 hafoin Funu Korea nian (1950-53), nasaun rua ne'e hakotu ona ho asinatura akordu ida maibé laiha formalizasaun ba tratadu dame nian.

Washington ho ONU hatudu ona preokupasaun ho tensaun nebe aumenta.

Estadus Unidus "hahú nafatin defeza ba aliadu" súl-koreanu no "haree nafatin situasaun ne'e", hatete hosi Pentágonu.

SAPO TL - ho Lusa/SIC Notícias – Foto: EPA@ Rodong Sinmun