Koronavírus MERS halo ema na'in tolu mate iha Arábia Saudita

Ema na'in tolu nebe infetadu ho koronavírus MERS mate foin lalais ne'e iha Arábia Saudita, nune'e númeru ba infesaun ne'e aumenta fali fulan ida antes peregrinasaun tinan-tinan ba Mekah.

Serbisu urjénsia hosi ospitál Rei Abdel Aziz taka temporáriu hafoin rejista tiha "infesaun hamutuk 46, inklui profisionál sira saúde nian", haktuir hosi jornál saudita Gazette.

Vítima foun na'in tolu ne'e - ema saudita ho tinan entre 65 ho 86 - aumenta nune'e númeru vítima mortál nian entre ema na'in 1.118 nebe infetadu ho koronavirus iha Arábia Saudita, fatin nebe moras ne'e mosu iha tinan 2012, haktuir hosi informasaun Governu lokál nian.

Entre loron 09 no 15 fulan-Agostu, rejista ona infesaun foun hamutuk 21, infesaun 20 iha Riade, haktuir hosi fonte hanesan.

Ministru Saúde nian, Khaled al-Faleh, nebe haktuir hosi ajénsia ofisiál SPA, garanti ona katak sei foti medida hodi prevene infesaun entre peregrinu sira.

Fiar-na'in millaun rua resin sei halo peregrinasaun tinan-tinan ba Mekah, programadu ona ba loron 21 fulan-Setembru.

Koronavirus MERS, infesaun pulmonár ida, mosu iha tinan 2012 iha Arábia Saudita no, foin lalais ne'e, iha Koreia-Súl, nebe halo ema na'in 36 mate.

Organizasaun Mundiál Saúde nian (OMS) identifika ona kazu hamutuk 1.368 nebe konfirma hahú tinan 2012 iha mundu tomak no pelumenus na'in 490 mate.

Vírus MERS hanesan vírus mortál, maibé ladún da'et, duké SRAS (síndrome respiratóriu todan ida) nebe halo ema na'in 800 resin mate iha mundu tomak iha tinan 2003.

SAPO TL ho AFP