Krime VD Maioria Julga Iha Tribunal, Komunidade Balun Menus Informasaun

DILI - Loron ba loron krime Violensia Domestika (VD) kontinua eziste iha Tribunal Distrital Dili (TDD) hodi halo julgamentu. Maske governu kria ona lei ba krime nee maibe komunidade sei kontinua halo krime nee hasoru nia kaben no oan sira.

Liu husi audensia julgamentu, arguidu no arguida sira balun seidauk hatene katak halo agresaun fisika hasoru fen no oan sira nee krime violensia domestika. Maske governu kria ona lei hodi redus krime nee iha familia liliu fen ho laen, maibe realidade arguidu balun nunka hetan informasaun kona ba asuntu nee. Too iha tribunal bainhira juis dehan agresaun fisika nee kontra krime violensia domestika, rona liafuan nee mak foin halo arguidu sira hakfodak hodi arepende ba sira nia hahalok.

Arguido Alberto neebe baku nia oan feto Antonia hodi trata ho liafuan at. Too ikus halo nia oan tenke halai sai husi uma ba hela fali ho familia too hola mane mak foin lori nia kaben ba aprejenta ba nia. Too iha tribunal mak arguidu nee foin hatene katak baku oan sira nee krime no kontra lei VD. Durante nee nia so hatene deit katak baku ferik oan mak kontra lei VD, maibe oan sira la kontra lei.

Nunee mos lezada Faustina hatete, nia parte la hatene katak agresaun neebe mak nia kaben halo ba nia nee kontra lei VD. Tanba nee bainhira nia simu agresaun fisika ka pankada husi nia kaben nia la halo keisa ba ministeriu publiku, maibe nia familia mak halo keisa hodi kontra nia kaben nia hahalok nee. Informasaun kompletu iha STL Jornal no STL Web, edisaun Sabado (15/8/2015). Domingas Gomes

Suara Timor Lorosae