Prezidente “husu deskulpa” ba akontesimentu ne’ebé hamate Mauk Moruk

Prezidente Repúblika, Taur Matan Ruak, lori Estadu ninia naran husu “deskulpa”, ba akontesimentu ne’ebé hamate eis-gerilleiru, Mauk Moruk bainhira matebian ho ninia apoiante tiru-malu ho forsa seguransa sira, iha sábadu liu ba. 

“Hanesan aman nasaun nian, Prezidente hakarak husu deskulpa ba sidadaun hotu, liu-liu ba família ne’ebé lakon ka haree ema ne’ebé sira hadomi hetan kanek. Hanesan aman nasaun, sente mós triste ho akontesimentu ne’e”, dehan xefe Estadu, no fó sai iha komunikadu hosi ninia gabinete ohin.

Komunikadu ne’e esplika katak Taur Matan Ruak ko’alia lia hirak ne’e bainhira iha inisiu semana ne’e halo vizita ba iha rejiaun Matata ho Ermera, sul Dili, hodi hatutan mós katak “koko atu labele iha tan akontesimentu fakar-ran no sente triste ho akontesimentu refere”.

Prezidénsia esplika katak alénde Mauk Moruk, elementu tolu hosi Konsellu Revolusaun Maubere (KRM) - lidera hosi eis-gerilleiru nian mós mate inklui sivil na’in rua, efetivu na’in sia hosi forsa defeza (F-FDTL) ho Polísia Nasionál (PNTL) nian mos kanek, durante akontesimentu tiru malu.

Iha diálogu ho populasaun suku Matata, postu administrativu Railaku, Taur Matan Ruak apela “atu hametin dame no relasaun amizade entre sidadaun, apela ba umildade, husu atu respeita malu, nomós iha konfiansa, hodi hatutan tan katak atu labele repete konflitu hanesan Mauk Moruk nian ne’e”.

“Ita husu ba Maromak atu ida ne’e hanesan konflitu ikus. Labele iha tan konflitu, no ita labele sadik malu tan”, dehan.

“Xefe Estadu hatutan tan katak Mauk Moruk ho ninia apoiante ninia sala, hamoos ona ho sira-nia raan no nia husu ba Maromak atu simu matebian hirak ne’e ho liman rua, atu nune’e bele haree fali timor-oan sira ne'ebe sei moris”.

SAPO TL ho Lusa