HATUDU BA MUNDU, FETO TL MOS BELE

Reprezentante siklista Feto Timor Leste, Domingas Catarina Guterres, hatete, feto Timor tenke hatudu ba mundu katak feto Timor-Leste mos bele.

“Hau hakarak dehan deit katak, feto husi rai seluk bele halai bisikleta, tanba saida mak feto Timor oan la bele. Kona ba kapasidade atu halai bisikleta ami prontu kompete mais ami nia bisikleta mak kualidade diferente tebes ho siklista internasional nian,” afirma Domingas ba JNDiario wainhira partisipa iha Tour de Timor 2015.

Domingas hateten, maske nia bisikleta nia kualidade la profesional hanesan ema estranjeirus nian, maibe nia halo esforsu duni hodi kompete ho feto estranjeirus sira ne’ebe maka partisipa iha Tour de Timor 2015.

Difikuldade ne’ebe maka feto Timor infrenta iha Tour de Timor 2015 ne’e maka menus esperensia no la iha treinador espesfiku ba bisikileta nian. Maske nune’e, Domingas orghulhu tanba partisipa Tour de Timor ne’e ho susesu.

“Hau hanesan feto Timor-oan ho hau nia esforsu hau konsege hetan IV lugar no tama iha kategoria Internasional,” hatete Domingas ho kontenti.

Durante aktividade ne’e hahu husi rute Dili-Laclubar, Lacluba-Betano Betano -Ainaro, no Ainaro-Hatubilico, rute ne’ebe maka sisklista sira senti diak no fasil hodi halai maske Estrada at maibe konsege tama duni iha linha remata.

Iha tinan oin 2016, Domingas sei hakarak kontinua tan no esperansa ba oin Governu sei loke matan no hodi konvida treinador husi rai liur mai fo treinamentu ba sisklista Timor-oan sira, atu nune’e eventu mai tan iha tinan 2016 sisklista Timor –oan mos bele okupa iha premeiru lugar hodi hetan rezultadu diak liu.

Domingas dehan, ho oportunidade ne’ebe maka koko halo klubu rasik Merkorius TL koko atu dada feto maluk sira mai partisipa iha eventu hanesan ne’e. Domingas partisipa iha korida bisikleta hahu iha tinan 2009 to’o mai 2015, karik iha tinan oin maka kondisaun permite nia sei nafatin partisipa.

Iha fatin hanesan, Siklista Fatima da Costa mos sente orgulho bainhira partisipa iha Eventu Tour de Timor hodi kompete ho siklista internasional no mos Mane sira.

“Hau sente orgulhu no kontente tebes, tanba hanesan feto Timor oan ida ho kapasidade minimu kompara ho siklista internasional sira hodi partisipa iha korida biskleta, ida ne’e atu hatudu ba ema seluk katak feto Timor mos bele. Ita labele hare deit ba ema seluk, mais ita mos tenke esforsu an rasik tanba ita mos iha kapasidade hodi kompete,” Siklista Feto TL ne’e dehan ho oin hamnasa.

Fatima Belo partisipa iha Tour de Timor la’os ema ida mak obriga, maibe ho vontade rasik no mos lahetan suporta ruma husi ema, mais sira ho inisiativa rasik hodi treino sosa bisikleta hodi ikus mai partisipa.

Fatima tuir eventu korida bisiklet tinan hat ona, garante tina oin sei partisipa nafatin. Siklista Feto isin metan badak fuk kribu ne’e husu ba feto TL sira ne’ebe mak gosta sa’e bisikleta bele kordena hamutuk ho sira hodi treinu atu nune’e iha futuru mai bele partipa mos iha eventu ne’e.

Feto TL ne’ebe mak partisipa iha eventu Tour de Timor 2015 hamutuk nain lima, kompostu husi, Domingas Catarina Guterres, Frangelina M. Cabral, Maria L. Marçal, Fatima da Costa ho Anita da Conceição. mia

Jornal Nacional