NOVEMBRU, TL LIDERA KONFERENSIA FJ-CPLP

Fulan Novembru agora, Timor-Leste sai uma nain hodi lidera konferensia Forum Juventude Comunidade Paises Lingua Portuguesa (FJ-CPLP) ba dala 8 ne’ebe sei hala’o iha Dili.

Prezidente Conselho Nasional Juventude Timor-Leste (CNJTL), Maria Dadi Soares Magno ba JN-Diário, Tersa (22/09), iha nia servisu fatin Farrol, Dili hatete, bazeia konferensia FJ CPLP iha tinan kotuk ne’ebe hala’o iha Guine Bissau, deside iha tinan 2015 ne’e Timor-Leste mak sei sai hanesan uma nain ba konferensia FJ-CPLP ba dala 8 ne’e.

“Fulan hirak liu ba kotuk ita anunsiu ba publiku katak, CJNTL kria ona komisaun organizadora hodi fahe ona seksaun-seksaun sira atu komesa halo preparasaun tekniku balun ba preparasaun konfrensia FJ CPLP ne’ebe sei halao iha fulan Novembru nia laran hahu husi dia 9 to’o 12 ne’e,” hatete Prezidente CNJTL.

“Tuir ajenda ne’ebe ita prepara tiha atu debate iha konfrensia FJ CPLP ne’e mak sei halo revizaun balun forum estatutu FJ CPLP nian no mos debate estatutu Pais Guine Equatorial tanba saida mak to’o agora sira seidauk bele sai hanesan membru FJ CPLP ne’e,” hatete ema numeru um iha CNJTL ne’e.

Prezidente CNJTL ne’e hatete, delegadus sira ne’ebe sei partisipa iha FJ CPLP ne’e, kada nasaun membru CPLP ida, ema nain 3, hamutuk ho Timor-Leste delegadu besik ema 30 mak sei partisipa iha konfrensia refere. Iha konferensia ne’e sei konvida mos delegadu   Conselho Juventude sira mai husi Munisipiu ho Postu Administrativu sira, reprezentante organizasaun estudantil sira, organizasaun joventude loriku asu wain sira, parseiru sira no mos nain ulun husi Governu sira atu mai asiste mos konfrensia ne’e.

Nia hatutan, atu realiza eventu ne’e, CNJTL hetan apoiu husi Governu liu husi Sekretariu Estadu Joventude no Desportu (SEJD), ho osamentu hamutuk U$ 187, 800 no Ministeriu Negosius Estranjeirus no Koperasaun (MNEK), ba protokolu ninian.

Fatin ne’ebe komisaun sei prepara ba konfrensi FJ CPLP ba dala 8 ne’e iha loron primeiru dia 09/11 sei halao iha Centru Convensoens Dili (CCD), tuir fali sei halao iha edefisu MNEK to’o remata. Des

Jornal Nacional