Sasin Avelino Afonso Brites: “Desizaun sosa kama Ba HNGV husi arguida Madalena Hanjam”

Sasin ba kazu sosa kama ba Hospital Nacional Guido Valadares (HNGV), Avelino Afonso Brites, deklara ba Tribunal Distrital Dili (TDD), Segunda (26/10) katak, desizaun ba proposta sosa kama ba HNGV ne’e mai husi arguida Vise Ministra Saúde IV Governu Konstitusional, Madalena Hanjam.

“Iha momentu ne’eba iha duni proposta atu sosa kama ba HNGV no desizaun ba proposta ne’e mai husi Vise Ministra Saúde, Madalena Hanjam,”dehan sasin Avelino Afonso Brites ba TDD, kona ba kazu deskonfia korupsaun ne’ebé involve husi eis Ministra Finansa, Emilia Pires ho eis Vise Ministra Saúde Madalena Hanjam.

Sasin Avelino Afonso haktuir, iha tinan 2009 to’o 2011nia hanesan Xefi Departementu Aprovizionamentu Ministeriu Saúde nian. Nia dehan, iha tinan 2012 hanesan Xefi Ekipamentus Saude nian, proposta ne’e mai husi assessor internaisonal ida naran Brush Norseon ne’ebe mak lori hela dokumentus kuotasaun ka brosur kompañia nian mai iha MS.

Nune’e nia simu tiha tiha brosur ne’e mak nia parte prepara dokumentus tenderizasaun nian, maibe kona ba orsamentu nia parte laiha koñesimentu, no nia mos la hatene proposta ne’e halo iha enkontru direktoral ka lae.

Tuir sasin Avelino katak, projetu sosa kama ba HNGV ne’e tama iha Single Source, entaun nia parte mos la hatene. Projetu sosa kama ne’e, nia afirma, la liu husi prosesu Comissão Aprovizionamento Ministerio Saúde (CAMS) nian, maibe tuir prosesu tenderizasaun hotu tenki liu husi prosesu CAMS ne’ebe mak Ministeriu forma ona iha tinan 2011.

“Tuir lolos prosesu ne’e ba uluk iha CAMS depois mak ba iha aprovizionamentu mak foin bele aprova, maibe prosesu ne’e direta husi Vise Ministra Saude Madalena Hanjam deit, no prosesu foti osan kontijensia ne’e foin primeira vez,”dehan sasin Avelino Afonso.

Sasin Avelino haklean liu tan katak, iha nia esperiensia hanesan Xefi Departementu Aprovizionamentu nian seidauk diak 100%, maibe liu husi Osamentu Jeral Estadu MS nian deit. Normalmente PO sai tiha mak foin halo kontratu.

Nia dehan, tuir prosesu ajudikasaun direta ne’e halo verifikasaun dala rua mak foin bele notifika kompañia ida kaer projetu. Maibe kazu ne’e la liu husi prosesu ne’e, no laiha kompañia seluk mak kompete ho kompañia Macs Metal Craff ne’ebé hatama kama ba HNGV ne’e. Tuir regra kompañia ne’e tenki iha kompetisaun.

“Ami simu orientasaun husi desizaun Vise Ministra Saude Madalena Hanjam hodi hala’o deit, ami laiha kompetensia ba prosesu ne’e” sasin Avelino hatete tan.

Avelino hatutan, projetu sosa kama ne’e primeiru kontratu iha 2011, maibe kona ba data mak nia la lembra ona. no distribuisaun kama ba HNGV hahú iha tinan 2012, iha kama 42 ba HNGV, Maliana 8, Maubisse 8. Distribuisaun kama ba etapa primeiru ne’e nia (Avelino) mak asina ho kama total 80.

Sasin Avelino dehan tan, nia asina lista ne’e tanba iha desizaun urjente husi Vise Ministra Saúde Madalena Hanjam hodi prepara lista ne’e haruka ba iha Ministeriu Finansas. Desizaun iha lista ne’e mak hanesan atu aumenta tan kama, sosa estrika no makina fase ropa, ekipamentus analisis nian, muskateru. No desizaun sira ne’e husu ba osan fundu kontijensia nian hodi selu dividas. Maibe nia rasik la hatene osan kontijensia ne’e atu uza ba saida? nia momentu ne’e hetan orientasaun hodi hala’o deit.

Depois halo asina tiha lista ne’e entrega ba iha gabineti arguida Madalena nian, depois diriji ba iha Ministru ho Primeiru Ministru Xanana Gusmão.

Nia kontinua sasin Avelino katak, depois hetan aprovasaun, nia la hola parte ona iha prosesu ne’e. Hotu tiha ida ne’e nia hetan orientasaun hodi prepara fali lista ba distribuisaun kama nian. Iha 2012 arguida Madalena haruka nia ba Australia hodi haree kama iha Melbourne, no vizita ne’e la’os servisu nian maibe atu ba haree kama iha kompañia Mac’s Metal Craft (MMC).

Iha vizita ne’e kontratu la’o tiha ona mak foin ba haree. Maibe tuir prosesu antes halo kontratu tenki haree uluk ekipamentus, justifikasaun ajustu diretu, proposta ne’e asina husi arguida Madalena Hanjam, no laiha karta ida mak arguida ne’e haruka ba iha aprovizionamentu.

“Iha 2012 kama mai primeiru iha Outobru nia laran no segundu mai iha Dezembru nia laran, total kama ne’ebe mai hamutuk 180. Iha Outobru mai uluk 100 resin no restu mai iha Dezembru nia laran. Kama sira ne’e antes halo distribuisaun, halo uluk inspesaun husi membru inspesaun MS nian,”haktuir sasin Avelino Afonso.

Audensia ne’e prezide husi juis kolektivu José Maria de Araújo, Francisca Cabral no Maria Solana Fernandes; Ministeriu Publiku reprezenta prokuradora Angelina Saldanha, Lidia Soares no Jacinto Babo, nune’e mos arguida Madalena Hanjam hetan asistensia legal husi advogadu privadu nasional José Guterres, advogadu internasional Nuno Morais Sarmos no Rui Costa Ferreira, arguida Emilia Pires hetan asistensia legal husi ekipa advogadu privadu internasional nain rua foun no advogadu nasional José Pedro Camões.Des

Jornal Nacional