Polísia indonéziu liberta suspeitu na'in tolu ho ligasaun ba atake terorista iha Jakarta

Iha loron-sesta ne'e polísia indonézia liberta ona mane na'in tolu ne'ebé sira kaer tanba deskonfia iha envolvimentu ba hahalok terorista sira ne'ebé akontese iha loron-kinta iha Jakarta, hafoin komprova katak laiha ligasaun ruma ho atake ne'ebé reivindika hosi Grupu Estadu Islámiku (EI).

Polísia klarifika ona katak libertasaun ba suspeitu sira akontese ona hafoin sira hetan interogasaun hosi autoridade sira seguransa nian.

Pelumenus ema na'in hitu, inklui atakante na'in lima no ema sivil na'in tolu, mate ona iha atentadu ne'ebé halo mós ema na'in 20 hetan kanek.

Autoridade indonéziu sira hahú halo asaun iha loron-sesta dadeer, hodi hahú revista uma ida ne'ebé situa iha besik Depok, iha súl kapitál, ne'ebé suspeitu na'in tolu uza hodi toba, deklara ona hosi ofisiál Dwiyono ba televizaun MetroTV.

Televizaun lokál hatudu ona imajen sira hosi mane sira ne'ebé aljemadu no akompaña hosi polísia, ne'ebé prende mós sasán sira ne'ebé hetan iha uma ne'e nia laran.

Hafoin kaer, lori suspeitu sira ba instalasaun polísia sira nian hodi hetan interogasaun kona-bá sira nia ligasaun ba atake sira, haktuir hosi responsável.

Autoridade sira fó sai ona iha loron-sesta ne'e katak reforsu seguransa iha parte importante iha sidade ne'ebé iha loron-kinta ne'e sai ona hanesan palku hosi atentadu oioin no tiruteiu sira iha bairu dalan Thamrin nian, zona sentrál ida iha Jakarta, ne'ebé situa hotel oioin no restaurante barak ne'ebé frekuenta hosi estranjeiru sira no eskritóriu sira hosi ONU.

Númeru hosi ajente sira iha besik embaixada no hospitál sira aumenta ona, nune'e mós adopta ona medida sira maka'as liu iha sentru komersiál sira.

Nasaun ne'e hanesan nasaun ida ne'ebé iha populasaun musulmanu boot liu iha mundu, ne'ebé hosi nia populasaun millaun 250 iha 88% maka hanesan musulmanu. Iha tinan 2000 no 2009 Indonézia hetan ona atentadu oioin.

SAPO TL ho Lusa