HASAI IMUNIDADE VICENTE, PN PRESIZA KARTA FOUN HUSI TDD

Tribunal Distrital Dili (TDD) presiza haruka fali karta foun ida ba Parlamentu Nasional (PN) atu husu hasai imunidade Prezidenti PN, Vicente Guterres nian.

“PN seidauk ajenda atu hasai imunidade ba Prezidenti PN, Vicente Guterres nian, tanba tribunal mos seidauk halo ajenda fila fali, ne’e depende korespondensias ne’ebe iha, korespondensias halo anterior la konsege ejekuta, tanba la iha levantamentu unidade,” informa Vise Prezidenti PN, Aderito da Costa Hugo ba Jornalista sira iha uma fukun PN, Segunda (11/01/2016).

Membru Bankada CNRT ne’e hatutan, kuandu Juis prosesu marka ona ajenda julgamentu ba kazu refere maka haruka karta mai PN hodi halo levantamentu, mais kuandu Parlamentu la halo levantamentu maka kazu refere labele julga.

Prezidente PN, Vicente Guterres, hetan akuzasaun husi Ministeriu Publiku (MP) komete krime abuzu de poder no naun partisipasaun ekonomia.

Antes ne’e mos deputado bankada PD, Adriano do Nascimento dehan katak, PN simu ona karta pedidu husi Tribunal Distrital Dili hodi hasai imunidade ba Sekretaria Estado Artes no kultura, Isabel Ximenes nian.

“Hau seidauk iha informasaun lolos kona ba ida ne’e, parese tama tiha ona, maibe problema maka se enkuantu la hasai imunidade membru Governu ka deputado ruma nia labele ba hatan iha tribunal, atu hasai imunidade presija liu husi prosesu hanesan karta husi Tribunal tama mai iha meja PN, prezidente PN fo despansu ba iha komisaun etika hodi halo pareser, depois hodi mai halo enkontru iha lider bankada, depois marka ajenda hodi debate iha meja plenaria,” hateten atual vise prezidenti PN ne’e.

Prezidenti Komisaun G, trata asuntu Etika, Agostinho Lay, dehan parte komisaun seidauk simu karta ida.

“Ami seidauk simu karta ida, kuandu tama ami nia tekniku sira fo hatene ami, iha informasaun katak los duni tribunal haruka ona karta mai, mais parese iha hela meja Prezidente PN nian no lakleur tan haruka mai komisaun hodi halo relatorio pareser depois komvida ho sekretaria Estado ne’e hodi mai ami hao audensia ho nia,” informa Agostinho Lay.

Sekretaria Estado Artes no Kultura, Isabel Ximenes deskonfia komete krime tolu kompostu husi krime partsipasaun ekonomi de negosio, abuzu de poder no abuku de neglijente. mia

Jornal Nacional