CNRT DIVÓRCIO PD…!!!

Jornal Nacional, editorial

Partido Congreso Nacional Reconstrusaun Timor (CNRT) ofsialmente hasai Partido Demokratiku (PD) husi Bloku Koligasaun tamba CNRT konsidera PD la obdese ona ba prinsipiu Bloku Koligasaun nian.

CNRT ho PD nee bele dehan casamento mais feliz iha tempo matebian, Presidente Partido, Fernando Lasama de Araujo ninia lideransa maibe Lasama saudozu tiha halo casamento partido rua nee mos komesa la feliz ona, mosu divorsio.

Partido CNRT ho PD lao hamutuk kuaze tinan 9 nia laran. Iha 2007 partido rua, CNRT no PD ho apoiu UNDERTIM, ASDT no PSD forma Aliansa Maioria Parlamentar (AMP), FRETILIN sai opozisaun too 2012.

Hafoin eleisaun jeral 2012, CNRT, PD, Frente Mundança harii Bloku Koligasaun, Fretilin kontinua oposizaun nebe forte teb’tebes iha Parlamentu Nasional, maibe depois de governu nomeia Sekretario Jeral Partido Fretilin, Mari Alkatiri lidera ZESSM, postura politika Fretilin mos muda.

Bankada Fretilin nebe kritika nee mos lakon, walk out mos laiha ona, votasaun ba programa no Orsamentu Jeral Estadu mos Fretilin fo votus 100%. CNRT komesa manan ona konfiansa Fretilin, iha 2015, Fretilin ninia ema tama governu, asumi pasta Primeiru Ministru no mos lidera ministeriu importante.

Involvimentu Fretilin iha governu sobu felizidade Bloku Koligasaun, Frenti Mundança sempre mai ho linguanjen diplomasia tamba Presidente Partido ema diplomatiku ida, Jose Luis Guterres, PD hafoin Lasama lakon iha palku politiku hodi fila ba mundo seluk, PD ibarat anak ayam kehilangan induk, komunikasaun bankada PD ho membru governu hosi PD lakon.

Bankada PD iha Parlamentu nasional koalia latuir ona prinsipiu Bloku Koligasaun nian, afeita ba representante PD nian iha governu, ikus mai CNRT nudar partido mais votadu casamento fali ho FRETILIN, divorsio PD.

Hakarak ka lakohi, nee mak realidade politika, CNRT nudar partido makaer ukun buka kaben partido seluk atu bele garante maioria kadeira iha PN hodi fo votus konfiansa ba Orsamentu Jeral Estadu bele aprova iha uma fukun nee.

PD partido nebe durante periodu rua, 2007- 2012 no 2012 – 2016 iha siklu governasaun, PD maske kadeira 8 maibe sai partido determinante ba CNRT ninia governasaun iha Aliansa Maioria Parlamentar no Bolku Koligasaun wainhira Fretilin iha opozisaun.

Agora PD tenki iha firmeza politika, lalika sai izmolador ba ukun maibe tenki difini an, toma posizaun sai fali ba Partido oposizaun hodi hatudu katak demokrasia iha Timor Leste nee funsiona.

Maske sai opozisaun ho kadeira 8 lian sei la makaas, ema la rona maibe nee atu hatudu katak funsionamentu estadu direitu demokratiku nee lao tuir duni koridor prinsipiu demokrasia nebe timor adopta.

Los duni oposizaun kadeira 8 laiha forsa politika atu bele influensia politika governu maibe hatudu katak oposizaun iha timor nee iha duni, se lae ema sira tau kestaun ba demokrasia nebe timor nee iha.

CNRT hasai PD iha Bloku Koligasaun nee tamba CNRT konsiente mensajen PR Taur Matan Ruak nian nebe kestiona demokrasia nebe timor nee iha. Timor Leste laiha ona oposisaun, Tan ne doque xefi estadu sai oposizaunm diak liu hasai PD hodi ba oposizaun do que Presidente Republika mak sai oposizaun.*