XANANA VIOLA AKORDU KOLIGASAUN

Vise Prezidente Partidu Frente Mudança, Vitor da Costa hatete, akordu koligasaun entre partidu tolu (CNRT, PD no Frente Mudança,) ne’e vale to’o tinan lima, maibe maun Xanana Gusmão Prezidente CNRT maka viola uluk kedas la’os foin agora.

“Isu uluk dehan atu halo remodelasaun nian ne’e hodi pasta Primeiru Ministru fo ba Rui Maria de Araújo ne’ebe mai husi partidu Fretilin, iha ne’e automatikamente viola ona akordu koligasaun ne’e,”dehan Vitor da Costa.

Nia dehan, antes hahú V Governo konstitusional iha akordu ida entre CNRT, PD no Frente Mudança, akordo atu forma bloku koligasaun, PD (Partidu Demokratiku) foin mak deskobre.

“Akordu koligasaun entre partidu tolu ne’e vale to’o tinan lima maibe maun Xanana viola uluk kedas la’os foin. Iha momentu ne’eba ami hatete ona katak, ami iha Prezidente da Republika nia oin ami dehan atu deklara sai husi bloku koligasaun tamba maun Xanana la fiar ona, la respeita ona akordu ne’e, mas tamba Prezidente dehan keta lai, imi tenki kontribui ba estabilidade Governativa ne’e maka ami la dehan buat ida, mas ami hatene kedas iha neba. PD como nia membru sei barak iha Governu, balu Ministru, Sekertariu Estadu ne’ebe sira hanoin ba sira akordo ne’e sei iha. Ba ami laiha ona desde atu halo remodelasaun ne’e,”dehan Vise Prezidente Partidu Frente Mudança Vitor da Costa iha Tasitolu, Dili, bainhira halo tomada de pose ba esrutura Frente Mudança, Sabadu (12/03/2016).

Nia hatutan katak, atu hasai membru PD husi Governu, ne’e maka hanaran remodelasaun.

“Kestaun ba ha’u mak ne’e hasai Ministru ida tau fali Ministru seluk, ida ne’e mak naran remodelasaun? Entaun tuir lei se mak halo remodelasaun, Primeiru Ministru. Mas surat n’ebe PD simu mai husi Sekertariu Jeral CNRT, kompetensia Primeiru Ministru iha ne’ebe? se mak sefia Governu, nia mak iha kompetensia hasai Ministru tau Ministru ida,”dehan nia.

Nia hatutan, iha eleisaun mai konserteza partidu bo’ot rua, CNRT ho FRETILIN ne’ebe agora ukun hamutuk, sira hakarak hamutuk nafatin atu ukun iha periodu oin mai. “Hasai PD agora hela partidu rua ne’e deit. Ho ida ne’e hatudu katak partidu rua ne’e lakohi ema seluk. Se sira ba oin mai partidu balun sei mosu tan, sei sai obstakulu ba sira entaun diak liu CNRT ho FRETILIN hahú hanoin hametin sira nia relasaun diak liu,”dehan Vitor.

Nia hatutan, ho Mudança ne’e sei fo impaktu liu-liu hamate demokrasia. Tuir regras demokratiku ida ukun, ida tenki hela ba opozisaun, agora se mak hela opozisaun, partido bo’ot rua ukun hamutuk laiha opozisaun, Frente Mudança ho kadeira rua halo opozisaun oinsa? hakilar mos ema la rona.

Husu kona ba iha posibilidade Frente Mudança ho PD halo koligasaun hamutuk, Vitor da Costa hatete, ne’e seidauk iha hanoin.

“Maibe kona ba hasai PD ou hasai ami, ne’e laiha liafuan dehan katak bloku de koligasaun fahe malu ona. Ida ne’e la iha, hakerek iha akordu ne’e vale to’o tinan lima, agora hasai konforme hakarak bloku koligasaun ne’e hakerek hela mas la konsidera ba FRETILIN ne’ebe laiha akordu koligasaun ba fali. Ne’ebe konfuzaun. Bo’ot sira hatudu exemplu ba ita jerasaun foun, ne’ebe ha’u mos admira bloku koligasaun la konsidera mas hasai nonok-nonok deit, ita lahatene remodelasaun kompetensia Primeiru Ministru Rui Maria de Araújo ka lae,”dehan nia.Nes

Jornal Nacional