FRETILIN SEI APREZENTA PROPOSTA REVÉ LEI PENSAUN VITALISIA

Bankada parlamentar FRETILIN, semana ne’e sei aprezenta proposta ba iha meja Parlamentu Nasional (PN) hodi revé lei pensaun vitalisia, ne’ebe sai ona kauza nasional.

Tuir deputado bankada FRETILIN, Francisco Miranda Branco, katak, lolos ne’e sira aprezenta ona, maibe tanba okupadu ho servisu iha Munisipiu maka seidauk bele finaliza proposta refere. maibe nia promete katak semana ne’e sei finaliza no entrega ba meja PN hodi husu debate urjensia.

“Iha loron 31 Marsu bankada FRETILIN sei finaliza projeto lei ne’e no entrega ba Prezidente PN, Vicente Guterres hodi husu debate urjensia, tanba iha dokumentu rua ona bele cross check referensia ba malu. Hau fo prazu semana ida ne’e tan, ami nia draf hodi deskute iha bankada finaliza hodi lori ba aprejenta, iha ami nia projeto de lei ne’e, hasa’e tempu mandatu, hatun pursertagem, mais ami sei deskute hela, ami sei hare mos husi pensaun vitalisia ba funsionarios sira hodi bele iha esperito ne’e hanesan, se lae diskrimina,” dehan Francisco M. Branco ba Jornalista sira iha uma fukun PN, Sesta (11/03/2016).

Reprezentante povu ne’e hatutan, tuir lolos iha ona projeto de lei alterasaun ida husi PD, FRETILIN mos sei prepara tan sira nian ida para avansa, FRETILIN hare katak se aprova agora mos laiha ema ida atu hetan fasilidade husi projeto de lei ida ne’e, tanba hahu iha tinan 2017 maka autor sira ne’ebe hetan sei hetan konsekuensia husi lei ne’ebe sira aprova.

Nia tenik, tuir lolos lei ne’e aprova tiha ona iha 2012, tanba projeto rua iha tempu ne’eba iha ne’e, maibe to’o mandatu hotu laiha buat ida, espera katak ho projeto ne’ebe mak husi bankada rua (PD-FRETILIN) hatama bele halo alterasaun ba lei pensaun vitalisia.

“Publiku hateten lei Pensaun vitalisia halo legalidade ba korupsaun, maibe hau hakarak fo exempu ida husi Portugal ninian, Portugal depois hetan krizi sira suspende tiha signifika katak labele iha pensaun vitalisia, maibe depois rekursu ba tribunal konstitusional, iha ne’ebe tribunal dehan dereito ida ne’e iha legalidade, ne’ebe hau hanoin to’o mandatu ba deputado sira iha terceira legislatura ne’e remata lei pensaun vitalisia tenke halo alterasaun ona, tanba lei ne’e mos iha tratamentu ladun hanesan entre membru Governu no membru Parlamentu sira, ne’ebe ami estuda kestaun sira ne’e hotu,” afirma Branco.

Entretantu, lei pensaun vitalisia oras ne’e dadauk sai preukupasaun bot Publiku nian, tantu husi estudante, sosiedade civil no mos sidadaun sira seluk, tanba konsidera lei refere habokur deit grupu balun iha Estado ida ne’e, tanba ne’e husu atu parte kompetente hanesan Parlamentu Nasional atu reve lei ne’e hodi nune’e bele benefisia ba ema hotu. Mia

Jornal Nacional