PARABENS PNTL…!!!

Jornal Nacional, editorial

Polisia Nasional Timor Leste (PNTL) Domingo 27 Marsu liu ba kompleta tinan  XVI  (27 Marsu 2000 – 27 Marsu 2016)  nascimento instituisaun seguransa nasaun ida nee hodi asumi responsabilidade garante seguransa sidadaun nian, mantein  lei no ordem publiku iha país nee.

Instituisaun polisia nee harii hosi governu transisaun Nasoens Unidas, simu formasaun mai husi ema nasaun oi-oin, kultura oi-oin no sistema oi-oin no mos membru polisia nebe foun nee tau insituisaun nee iha frajilidade.

Ho frajilidade instituisaun nee fasil tebes monu ba tentasaun, manobra politika nebe instoituisaun nee dala wain tebes monu iha krize institusional nebe ameasa tebes vida instituisaun nee.

Instituisaun nee mos hakiak grupo oi-oin, grupo arte marsiais, membru polisia balun defende sira nia artemarsiais nebe sira pretense ba, iha grupo polisia nasionalista no otonomista no membru polisia veteranos no membru polisia  eis POLRI.

Ho grupo de pertense nee barak teb-tebes  nee halo instituisaun nee infrenta ondas boot 4 Setembro 2004, problema entre Polisia ho F-FDTL no insituisaun nee mos lori todan krize 2006 nebe lakon membru barak iha akontesimentu nebe akontese iha frente Ministeriu Justisa nian.

Maske inistuisaun nee up and down, falta rekursu material no menus pessoal polisia, atendementu ka atuasaun polisia nian dala wain la satisfaz  publiku tomak maibe nee mak kapasidade nebe ita nia polisia sira iha.

Selebrasaun aniversariu nee nudar momentu importante hodi halo reflesaun ba esistensia insituisaun nian hodi melhora antedementu ba publiku ho profesionalismo no rigor nunee bele manan konfiansa publiku.

Los duni, publiku, inklui membru Parlamentu sira kestiona atuasaun polisia nian iha terreno nebe dala balu viola direitus humanos, atuasaun brutalismo, uza atributu nasaun nian ba intrese privado no atuasaun ba situasaun ho emosaun, odiu no viganza.

Maske nunee orgulho ba timor, instituisaun nee ho berani simu responsabilidade seguransa husi UNPOL iha 2011, hodi kontrola situasaun seguransa tomak pais nian. Polisia mos Asumi responsabilidade hodi halo operasaun konjunta iha krize no operasaun konjunta buka  Mauk Moruk.

“Ita presiza  rekoñese katak, PNTL konsege ultrapasa ona husi  frajilidade lobun   ida no konsege  aperfeisoa nia a’an, hodi mos konsege halo diak  liu tan ba planeamentu  no adminsitrasaun  ba rekursus umanus, iha mosaun oi-oin  ho objetivu  atu servi  ba ita nia populasaun  no  nia patria,” Rui Maria de Araújo.

Los duni senhor Primeiru Ministru, tinan XVI nee seidauk tama kategora idade joven maibe konsidera instituisaun nee ultrapasa ona tempo frajilidade no atuasaun balu komprova insituisaun nee iha ona maturidade de pensamento.

Tan nee, nudar sidadaun nebe diak, agradese ba esforsu tomak, ofisiais no kudro lideransa superior sira no ajentes tomak ba dedikasaun tomak hodi garante seguransa, paz no estabilidade. Povu moris hakmatek, moris ho seguru, mantein lei no ordem  nudar esperansa ita tomak nian.  parabens, parabens eh paranbes ba Polisia Nasional Timor Leste.*