Tuberkuloze oho ema na'in tolu iha minutu ida iha mundu tomak

Iha minutu ida ne'ebé liu, ema na'in tolu mate tanba tuberkuloze iha mundu tomak no pasiente 2% de''it maka iha asesu ba ai-moruk foun sira. Alerta ne'e mai hosi asosiasaun oioin no mosu antes selebra Loron Internasional ba Luta hasoru Tuberkuloze.

Tuir koligasaun PLUS, ne'ebé halibur asosiasaun oioin hodi luta hasoru Sida, ema millaun sia resin maka hetan tuberkuloze no millaun 1,5 mate tanba moras ne'e iha tinan 2014.

"Ema sira ne'ebé hela ho HIV bele hetan tuberkuloze, ne'ebé hanesan moras oportunista ne'ebé mosu beibeik ho ligasaun ba Sida no hanesan kauza dahuluk mate nian hosi ema sira seropozitivu nian", aponta hosi PLUS iha komunikadu, antes hatete katak situasaun hanesan preokupante liu iha Áfrika, maibé mós iha Roménia, "ne'ebé kazu sira rezisténsia nian aumenta maka'as tanba laiha asesu ba tratamentu no kuidadu sira".

Organizasaun Médecins sans Frontières (MSF) lamenta katak tinan rua liutiha hafoin aprovasaun ba molékula foun rua - Bedakilina ho Delamanida - ne'ebé permiti trata pasiente sira ne'ebé iha tuberkuloze multirezistente ba tratamentu baibain sira - fó de'it ba pasiente 2%.

"Hafoin sékulu metade ba tentativa sira, ita iha ai-moruk foun sira ne'ebé bele salva pasiente sira iha estadu todan liu no hanesan frustante bainhira labele fó ai-moruk sira ne'e ba pasiente tomak ne'ebé presiza duni", esplika hosi Joseph Tassew, kordenadór médiku hosi MSF iha Rúsia, nasaun ida ne'ebé afetadu liu ho kazu sira tuberkuloze multirezistente nian.

Tuir MSF, tratamentu sira ne'ebé uza liu hasoru forma sira tuberkuloze nian iha folin entre dolár 1.800 no 4.600 ba pasiente ida, menus duké gastu iha tinan 2011 (entre dolár 4.400 no 9.000).

"Maibé, aumentu hosi ai-moruk foun rua no molékula importante sira seluk ba kompozisaun hosi tratamentu ida ne'ebé di'ak liu aumenta ona folin sira", esplika hosi MSF ne'ebé luta atu laboratóriu sira hato'o folin "viável sira" ba nasaun sira ne'ebé iha dezenvolvimentu.

"Bele trata tuberkuloze; ohin loron hanesan moras infesiozu ne'ebé oho liu iha mundu", hatutan hosi Grania Brigden, espesialista iha tuberkuloze hosi Kampaña ba Ai-moruk Importante sira (CAME) hosi MSF.

Koligasaun PLUS hanoin katak "tenki iha resposta mundiál lalais ida" no konvida prezidente sira hosi Fransa, François Hollande, no hosi Áfrika-Súl, Jacob Zuma, ne'ebé iha loron-tersa ne'e sei hasoru malu iha Lyon, "hodi mobiliza maka'as hodi hatán ba luta hasoru tuberkuloze no HIV, katástrofe loloos sanitáriu mundiál nian".

SAPO TL ho Lusa – Foto: Pasiente sira ne'ebé iha kadeia Cipinang, Indonézia, hein hodi simu konsulta jerál. EPA@ Mast Irham